KHAWTHLIR

Pa zir chian dan tur sawiho

NLUP Implementing Board (NIB) vice chairman PL Thanga hoin nimin khan NIB conference hall-ah pâ (mushroom) zir chian dan tur sawiho a ni. Mizoram sorkar, Mizoram University leh University of Minessota thawhhona hnuaiah MZU chuan pa ei chi zirbingna nei turin University of Minessota-ah MZU-a Environmental Science department-a assistant professor Dr John Zothanzama a tír a, ani hian hmalak dan tura rawtna a siam chu NIB-ah a thehlut a ni.

Thisen pe

Ruallung Branch YMA chuan YMA Day pual-in June 6, 2016 khan Aizawl Civil Hospital tan thisen unit 48 an pe a, a petute mipa 44 leh hmeichhia pali an ni.

Chetsualnaah thi

Thawhṭanni zing dar 8:30 vel khan Samthang leh Vaphai inkarah 207 pick-up chesualin, kawng thlangah metre 50 vela thui a lum a, Vanlaldiki (39) w/o Thawmvunga, Khawbung chu chetsualna hmunah a thi. Motor hi Laldinthara, Dungtlang ta niin, mi 12 an chuang a, mi pakua hliamin, Khawbung damdawi-in panpui an ni a, mi pakhat admit a ni.

ASEP-in ngen

Association for Environmental Preservation (ASEP) chuan, Durtlang khâm leh a chhehvelah saza leh ramsa dang dang an chhuak zeuh zeuh ṭhin tih sawiin, humhalh tlat a ni a, tihnat phal a nih loh thu an tarlang a, "He lai hmuna ramsate hi tirálkhèltu ni lo a, ṭha taka humhalhtu ni ṭheuh turin mipui kan a ngen a ni," an ti.

Green Mizoram

June 6 & 7 khan Mamit leh Champhaiah Green Mizoram Day hman dan tur sawiho a ni. Nimina mamit DC Lalbiaksangi hoa ṭhukhawm chuan Mamit leh Bairabi kawngpui leh khawpui chhungah thing phun an rel. Champhai DC Vanlalngaihsaka hoa DC conference hall-a
ṭhukhawm chuan rang kâng ven kawnga thawk ṭha khuate chawimawina hlan an rél thung.