KMMTTP kawng siamtute la dang zel Thu lawmawm dawn loh chuan tihtawp tum lo

Lawngtlai District Land Owners' Association (LDLOA) chuan Kaladan Multi Modal Transit Transport Project (KMM-TTP) kawngpui siamnaa ram laka zangnadawmna pek phûta kawng siamtute hna thawk tur June 1, 2016 aṭanga an dan chu an la chhunzawm zel a; sorkar aṭanga thu lawmawm an dawn hma chuan an dang zel dawn tih an sawi.

LDLOA vice president H Ram-mawia chuan, KMMTTP kawng siam hna thawktu contractor pahnih - RDS leh Atlanta ARSS Infrastructure hnuaia thawktute an dan chu Lawngtlai SP leh additional DC-te'n titawp turin ngen mah se, sorkar aṭanga thu lawmawm an dawn loh chuan an dan zel dawn thu a sawi a, "May 24-a general Meeting-a kan rel tawh angin, kan kal zel dawn a, kan titawp lo ang," a ti.

Vanglaini palai zawhna chhangin H Rammawia chuan, kawng siamtute an dannaah hian hmun 12-ah an duty tih sawiin, "Company pahnihte camp zawng zawngah kan duty vek a ni," a ti a; tlaivara an duty ṭhin thu leh, company lamin hna thawh luih an tum loh thu a sawi.

H Rammawia chuan, an thil phût chungchangah Chief Minister leh Land Revenue & Settlement department hotute hmu turin June 9 hian Aizawlah kal an tum thu a sawi a; Aizawlah press conference neih nghal an tum thu a sawi bawk.

PWD hotute sawi danin, KMMTTP kawng siamnaah mimal ram eng emaw zat lak a ni. A tira ram enfiahnaa ram neitu dik tak nia hriat mi 165-te chu zangnadawmna cheng nuai 927 pek a ni tawh a; mahse, a tira tel lo mi dang 800 velin an ram nei nia an insawi leh avangin J Sanghulha leh mi dang 146-te chuan an ram neihna lehkhate nen Gauhati High Court-ah petition an thehlut a ni.

High Court thuchhuak angin, ACB-in zangnadawmna diltu mi 800 zinga a zatve vel dilna chu enfiah tlaka ngaiin an enfiah a; chumi hnuah chuan Lawngtlai DC, district collector ni bawk chuan an thil hmuh dan report chu Mizoram sorkarah a thehlut a, thil inmil lo ṭhenkhat hmuh chhuah a nih avangin enfiah leh tura tih a ni.

Lawngtlai DC chuan, thil awm dan a enfiah nawnna report chu May 31, 2016 khan Mizoram sorkara Land Revenue & Settlement department-ah a thehlut nawn leh a, chu chu sorkarin a enfiah mek niin PWD hotute chuan an sawi. Sorkarin a tihfel phawt loh chuan zangnadawmna sum an pe chhuak thei rih lo tih an sawi bawk.