ZNP-in kalphung mumal nei turin chah

ZNP chuan thuchhuah siamin, Home minister R Lalzirliana’n Congress sorkar chhungin corruption donaah theihtawp an chhuah a, mi eng emaw zat hrem an nih tawh thu a sawi chu lawmawm an tih thu an tarlang a; eiruk do kawngah sorkar chu árkhawthim dâi lo a, kalphung mumal tak nei turin an chah.

ZNP chuan, ZNP a sorkar chuan corruption dona turin khaw tinah cordination committee din a nih tur thu an sawi a, "VC/LC aiawh te, NGO leh kohhran leh party tin aiawhte an tel ang a, sorkar sanction copy reng reng coordination committee leh bialtu MLA pek zel a ni ang. Khaw chhunga sorkar hmalakna ṭawiâwmtu leh thil kal sual tur vengtu an ni ang a, action lak ngaia an hriatte chu thuneitute hnenah an thlen thei ang," an ti.

ZNP chuan, an sorkar chuan state level-ah pawh corruption dona atan chief minister kaihhruaina hnuaiah implementation committee a awm ang a, recognise party aiawh te, kohhran leh NGO aiawhte leh corruption do kawnga ṭangkai thei pawl aiawhte an tel tur thu an sawi bawk.