Neymar-a'n Messi leh Ronaldo tluk pha lo - Pele

Brazil legend Pele chuan tun dinhmuna Selecao zinga football thiam ber anga ngaih Neymar chuan Barcelona tana a khelhpui Lionel Messi leh Real Madrid forward Cristiano Ronal-do te tluk pha tura theihna a neih loh thu a sawi.

Kum 24-a upa Neymar hian season liam ta khan inelna hrang hrangah goal 31 a khung a, 2016 Ballon d'Or-ah Messi leh Ronaldo te chiah a tluk lo.

Pele chuan, "Neymar hi a naupan tet aṭangin ka hre tawh a, kum tam tak kalta khan coach-in a ṭhat thu min hrilh. Coach sawi ang chiah hian theihna chu nei mah se Messi leh Ronaldo te tluk pha tura theihna a nei lo," tiin a hnampui Neymar chu khawvela ṭha berah a ngai lo.

Kum 75-a upa Pele chuan, "Tun dinhmuna khawvel ṭha ber sawi a ngai a nih chuan ka chhanna chu Lionel a ni. Portuguese hian khelhdan bik a nei a, mah se ka ngaihdan chuan Messi a ṭha ber," tiin Argentina captain a fak.

Khelmual chhunga Neymar-a'n uchuak deuh hleka a khelhdan sawiin Pele chuan, "A chetdan hi player zawng zawng tih dan a ti lo, Zico-a'n a tih ngai lo ang chiahin Pele pawhin a ti ngai lo. Player tinin khelhdan an nei vek a, mah se kan khingpuite kan zah tur a ni. Entirna ṭha tak chu Romario a ni," tiin khingpuite zah a pawimawh thu a sawi.