Aikal late ni 30 chhunga an hna thawk chhunzawm tura tih an ni

Mizoram sorkar chuan sorkar hnathawk, aikal late chu ni 30 ral hmain an hna thawh chhunzawm turin a hriattir a, hna chhunzawm lote chu dan loa châwl (unauthorised absence)-ah ngaih an ni dawn.

DPAR secretary K Lalthawm-mawia chuan nimin khan Office Memorandum a tichhuak a; CCS (Conduct) Rules, 1964 Rule 3(1) angin sorkar hnathawkte chu an hnaa rinawm tur te, inthununna leh an tih tur leh mawhphurhnate ngai pawi-mawh tura beisei an nih thu a tarlang.

DPAR Office Memorandum-ah chuan, sorkar hnathawk zingah hun rei tak tak aikal chhawr an awm tih hriat a nih thu leh chutiang chu mahni hna ngaihthahna a nih thu te, mahni hna thawk ṭha duh lote chu CCS (Conduct) Rules, 1964 hmanga hrem theih an nih thu te, aikal late chungah sorkarin dan anga action a lak dawn thu te, June 6, 2024-a Council of Minister ṭhukhawmin aikal lâk rêng rêng tihtawp vek turin thutlukna a siam thute a chuang.

Sorkar hnathawk aikal late chu hriattirna (office memorandum) chhuah aṭanga ni 30 chhungin an hnaah lêt vek tura hriattir an ni a; ni 30 chhung (July 19, 2024 hma)-a mahni hna zawm lote chu dan loa châwl (unauthorized absence)-ah ngaih an ni dawn a, an chungah disciplinary action lak tur a ni.

Aikal late chungchangah a ṭul anga hma laa bawhzui turin department/office hotute hriattir an ni a; an bawhzui dan (compliance report) chu hriattirna chhuah aṭanga ni 45 chhungin DPAR (ARW)-ah thehlut tura tih an ni.

Damlote leh natna khirh neite chu hriatthiamna a awm dawn a, dan angin chawlh (leave) an neih ang zawng zawng an lak phalsak a ni dawn. Damlo leh natna khirh tuarte chu Medical Board aṭanga 'Medical Certificate of Incapacity’ laa thehlut tura chah an ni a, an dinhmun azirin ngaihnathiamna (special consideration) pek theih a ni ang.

Aikal la mek, an hna thawh chhunzawm thei/duh lote tan CCS (Pension) Rules, 1972 angin voluntary retirement, invalid pension leh compulsory retirement-te dil leh pek theih an ni dawn a; dana awm sa anga châwl thei lote tan 'Special Voluntary Retirement Scheme' siam tum a ni bawk.

Sorkar hnathawk aikal late ni 30 chhunga an hna chhunzawm tura hriattirna hian Mizoram sorkar hnuaia thawk zawng zawng - regular employee, co-terminus (CSS), part-time, casual, work-charged, contract leh provisional employee-te a huam vek a ni.