Minister-in Horticulture Fair a hawng

Horticulture department chuan nimin khan Aijal Club Park-ah Horticulture Fair 2024 an buatsaih a, Horticulture minister Prof. Lalnilawma'n a hawng. Fair hawnna puala Aijal Club-a inkhawmah Best Horti­culture Farmer atana thlan mi 11 hnenah lawmman hlan a ni.

Prof. Lalnilawma chuan, Horticulture Fair buat­saih a ni leh ta chu lawmawm a tih thu sawiin, "Horticulture Fair kaltlang hian department leh kut hnathawktu kan partner-te nena kan hmalakhonate miin min rawn hriatpui a, chuta ṭang chuan chona thar kan nei a, hmasawn zel turin min tiphûr ṭhin a ni," a ti.

Hmalakna tur a la tam thu sawiin Lalnilawma chuan, "Tuna kut hnathawktu hlawhtling kan tihte hi an hlawhtlinna kan tehna tur chu kum khatah cheng engzat nge an lak luh tihah a ni. Horiculture department hi kut hnathawktute sum lak luh tipungtu ber nih kan tum tur a ni," a ti a; sorkar leh kut hnathawktute inkarah thawhhona ṭha a awm zel a beisei thu a sawi.

Horticulture secretary K Lalrinzuali kaihhruai Fair hawnnaah hian Horticulture Minister chuan district tina kut hnathawktu hlawhtling leh thawk ṭha thlan chhuah mi 11 hnenah Best Horticulture Farmer lawmman a hlan.

Horticulture Fair-ah hian stall 202 a awm a, pangpar stall 130, thei ṭiak stall 55, pot stall pakua, leiṭha stall pathum, theitui/pickle stall pangate a ni.

Horticulture department hian kum 2012 aṭangin Horticulture Fair an buatsaih ṭhin a; Covid-19 hripui lêng vangin kum 2020 leh 2021-ah an buatsaih thei lo. Kum 2012 aṭanga 2023 thleng khan fair-a stall siamtute'n an thil zawrhte an hralhna aṭangin Rs 3,19,40,606 an la lut tawh a ni.