Naupang leh hmeichhia zirchianna tlangzarh

Social Welfare, Tribal Affairs, Women & Child Development (SWTAWCD) minister Lalrinpuii chuan nimin khan SAD conference hall-ah Population Council Consutling, New Delhi-in Mamit district an zirchianna, ‘Diet Diversity and Nutritional Outcomes Among Children and Women: A Study of Mamit District’ tih lehkhabu a tlangzarh.

Tarlan danin, Integrated Child Development Services (ICDS)-in India ramah anganwadi nuai 14 a huam a; Mizoramah ICDS project 27 kalpui mek niin, anganwadi 2,244 enkawl mek a ni.

Poshan tracker-a a lan danin, Mizorama ICDS project kalpui mek hnuaiah hamṭhatna dawngtu mi 1,17,782 an awm a; chu'ng zinga 1,08,255 chu naupang kum 6 hnuai lam an ni a, nu nau pai 5,912, nu nau hnute pe lai 3,610 leh hmeichhe tleirawl (kum 14-18 inkar) 19,240 an ni.

Minister Lalrinpuii chuan, hmeichhia leh naupangte'n ei tur ṭha leh khamkhawp an hmuh ngei a pawimawh thu a sawi a, "Sorkarin state, district, block leh sector level-ahte inzirtirna nasa takin a kalpui mek. Sorkar chauh ni loin, tlawmngai pawl, khawtlang leh mimal ang pawhin hmalak leh ṭan lak a ṭul a ni," a ti.