HM leh kuhva chîngtute inkâwm : Sorkarin a tih theih a ti zel dawn - HM
Hachhek, Vairengte leh Bilkhawthlira kuhva chingtute chuan nimin khan Home minister K Sapdanga a pisaah an kâwm. Home Minister chuan, dan loa kuhva rah hmanga sumdawnna titawp turin sorkarin a tih theih ang ang a tih zel dawn thu a sawi.
Khaw pathuma kuhva chíngtute hian tun hnaia kuhva hralhna chungchanga harsatna hrang hrang an tawh dan leh harsatna chinfel a nih theihna tura pawimawhte an tihte Home Minister hnenah an thlen a ni. Minister chuan, kuhva chíngtute'n harsatna an tawh an thlente chu a theih ang anga chinfel sak a tum thu a lo hrilh.
K Sapdanga chuan, sorkar thar a pian aṭangin a theih ang angin dan loa Mizoram paltlanga kuhva lak luh an do thu a sawi a, "Hun rei lo te chhungin kan police-te pawhin an man tam tawh hle. Chutih rual chuan vawiin thlengin he sumdawnna hi a la kal reng a, police duty hêlin a tam zawk phei chu an kal ṭhin em ni tih tur a ni," a ti.
Home Minister chuan, sorkarin dan loa kuhva sumdawnna titawp turin theihtawp a chhuah zel dawn tih a sawi a; kuhva chingtu Zoram hmun hrang hranga mite bakah, chîng ve lem lo, an kal tlangna ṭhin khuate chu sorkar thawhpuia, sorkar thâ tichak turin a sáwm.
Kuhva chingtute'n dan loa kuhva ro sumdawnna vanga an kuhva tharte an hralh hlei thei lo mek chu pawi a tih thu sawiin K Sapdanga chuan, "He harsatna hi a reh theihna turin sorkar chuan a tih theih ang ang tih zel a tum dawn a ni," a ti.
KUHVA CHINGTUTE THU THLEN
• Mizoram chhunga Burma kuhva phur check-na hmun khauh lehzuala kalpui.
• Vairengte leh a chhehvelah dan loa phurh luh kuhva dah khawmna kudam la awm nual hi June 30, 2024 ral hmaa man tur leh thian fai turin.
• Tun hnaia sorkar thuchhuah, certificate of origin pek dan tur hi a him tâwk loin kan hria a, kuhva chíngtute tan thil buaithlak tak a nih dawnin kan hria. Ennawn emaw, tih rih loh ni se.
• Kuhva tharte market ṭha zawk leh rintlak sorkarin ngaihtuahpui tur leh kuhva chingtute nena hmalakho dan ngaihtuah.
• Hachhek bialin kuhva an tharte an hralhna kalkawng ber, Assam via Karimganj district chhunga harsatna an tawhah hmalakpui turin.