Chief Minister-in RAMP a tlangzarh
Micro, Small leh Medium Enterprises (MSME)-te tihchangtlunna tura duan, Raising and Accelerating MSME Performance (RAMP) chu nimin khan chief minister Lalduhoma'n Vanapa Hall-ah a tlangzarh a, Facilitation Cell a hawng nghal. Mizoramah MSME sumdawnna unit 34,900 vel a awm mek tih tarlan a ni.
RAMP hi Ministry of Micro, Small leh Medium Enterprises (MSME) hmalaknaa kalpui a ni a, Mizoramah chuan Commerce & Industries department-in an kalpui dawn. RAMP nodal officer Lalhmunsiama tarlan danin, Mizoramah MSME sumdawnna unit 34,900 a awm mek a, a zatve aia tamin Udyam registration an la nei lo.
Chief Minister chuan, Covid-19 léng avangin industry-te'n harsatna an tâwk nasa tih sawiin, "Kan industry-te'n chak zawka hma an sawn leh theih nan Central sorkar chuan RAMP a rawn duang a, state-te chu keimahni mamawh ang zawnga guidelines duan min phalsak. Kan mamawh ang tak leh kan policy milin kalpui dan tur kan duang a, a hming pawh MSME Elevate Mizoram (MEMiz) tiin kan vuah a ni," a ti.
Mizorama industry awm sate leh ding thar zel turte chhawr ṭangkai turin Facilitation Cell din a nih thu sawiin Lalduhoma chuan, "India ram economy 30% vel hi small scale industry-te thawh chhuah a ni a, hna thawktu 46% vel chu small scale-a thawkte an ni bawk," a ti a; central scheme-te chu Hand Holding Policy nen kai kawpin nasa taka hmalak an tum thu a sawi.
CM Lalduhoma chuan, an sorkar veleh Mizoram Investment Policy, 2024 an siam nghal tih sawiin, "Kan ṭangkaipui tur investor kan dap zui a, Mizoram State Industrial Policy, 2012 pawh ennawn mek a ni. Kan sorkar veleh khan State Incentive Subsidy scheme-ah cheng nuai 42.31 chu revised estimate angin kan dah nghal a, kumin sorkar kumah pawh nuai 42.31 tho dah leh a ni," a ti.
Industry chu economy innghahna pawimawh a nih avangin a thei apiangin industry lamah hma la se an duh thu sawiin, "Sorkar ṭanpuina chauh beisei, hlawhtlin tum tak tak lo, a thlawna pawisa dawnna tur emaw tite tan erawh chuan 'Bui lung tâwk' ang hlauh kan ni dawn. A thlawna sem, a thlawn a dawn, kan moral eichhetu hi kan malmâk hmiah dawn a ni," a ti a; mite'n industrial unit leh service sector unit-te din zel se an duh thu a sawi.
Commerce & Industries minister F Rodingliana pawhin thu sawiin, kamding nih aiin mahni kea ding nih Mizo ṭhalaite'n an tum a ṭul tawh thu a sawi a, "Mi dangte thuhnuaia awm loa mahni thu anga hna thawhna, pension awm ve lo, tu leh fate thlenga chhawm theih eizawnna a ni," a ti.