ṬKP-in 'Hriselna atana tlân' an huaihawt

Mizoram Ṭhalai Kristian Pawl (MṬKP) buatsaihin nimin zing khan hmun hrang hrangah 'Hriselna atana tlân' huaihawt a ni a, ṬKP member ṭhahnem tak an tel.

Kumina Mizoram ṬKP rorel chuan, 'Hriselna chungchanga ṭhalaite'n hma kan sawn theih nan hma lak ni se' tiin an rel a; chumi bawhzuina atan nimin zing khan 'Hriselna atan tlan' tih hun an buatsaih a ni.

Lungleiah chuan khawpui chhim lam leh hmar lam aṭangin TKP member ṭhahnem tak an tlân a, Lunglei Venglaia Tennis Court an pan khawm a ni. Tennis Court-a khârna inkhawmah MṬKP president Upa R Lalrochama, additional DC James Miahlung leh deputy chief medical officer Dr Lalrinthangi ten thu an sawi.

Aizawlah chuan Vanapa Hall kawtah hun hman a ni a, Health minister Lalrinpuii'n hmanpuiin, fuihna thu a sawi bakah, tlân turte a vailiam. Lawngtlaiah pawh Areopagy-ah hun hman a ni a; Mizoram chhung leh páwna ṬKP bial leh unit-te'n an remchan angin an hmang bawk.