Champhaiah dan loa lakluh meizial bâwm 39,000 tichhia

Champhaia Legal Metrology enforcement-te'n kum 2023 chhunga ram dang aṭanga dan loa meizial lak luh an man báwm (packet) 39,000 chu nimin khan Legal Metrology pisa tualah tihchhiat a ni a, district bawrhsap james Lalrinchhana'n a hmanpui.

Meizial an tihchhiatte chu brand chi pasarih a ni a, tualchhunga hralhna ang chuan Rs 20,00,000 man a ni. Controller of Legal Metrology thupek leh District Magistrate hriatpuinain Mizoram Legal Metrology (Enforcement) Rules, 2010 Rule 19(4)&(6) tlawhchhanin tihchhiat a ni.

James Lalrinchhana chuan, dan loa meizial lak luh leh zawrh mante tihchhiatna hun hman chuan dan loa thil tih donaah rah ṭha a chhuah a beisei thu a sawi a; thawktu indaih lo tak chunga Legal Metrology hmalakna fakawm a tih thu leh, District Anti-Tobacco Squad-te ṭhahnemngaihna fakawm a tih thu a sawi.

Champhaia Legal Metrology assistant controller V Lalfakzuala chuan, Legal Metrology (Packaged Commodities) Rules 2011 leh The Legal Metrology Act, 2009 hmangin dan bawhchhiaa ram dang meizial lak luh leh zawrhte man ṭhin a nih thu a sawi. Dan loa foreign cigarette lak luh avangin cheng vbc. 10,000 chuang meizial aṭanga chhiah hmuh tur a kiam phah thu a tarlang bawk.

Foreign cigarette tihchhiatnaah hian Legal Metrology department thawkte leh Champhai District Anti-Tobacco Squad member-te an tel a ni.