Vawk vulhtute'n Lunglei DC an dem; Chief Secretary leh DC thupek a inkalh?

Mizoram Pig Farmer’s Association (MIPFA) chuan, June 17, 2024-a Lunglei DC Ramdinlian'n Lunglei Expo a hawnnaah 'Tun hnaia frozen vawksa lei khapnate chu a tunlai tawh loin thliarkar rilru a ni,' tia a sawi chuan MIPFA member-te rilru a tihnat thu an tarlang. Vawk chungchanga Chief Secretary thupek leh Lunglei DC thupek a inkalh niin an sawi bawk.

MIPFA chuan thuchhuah siamin, Lunglei DC thusawi hi Zonet JB Chanchintharah puan a nih thu an tarlang a, "Min barakhaihin kan rilru a tina hle a ni," an ti.

Mizoram hmun hrang hrangah African Swine Fever (ASF) a léng mek a, vawk vulhtute'n an vawk vulh lai tam tak an chan tawh tih an tarlang a; chief secretary Dr Renu Sharma, Mizoram State Disaster Management Authority (MSDMA) chairman ni bawkin May 30, 2024 khan vawk, vawksa leh vawksa aṭanga siam thil eng pawh Mizoram páwn aṭanga lak luh khapna thupek a chhuah thu an tarlang a ni.

MIPFA chuan, Mizoram pawn aṭangin vawk leh vawksa lam chi reng reng lak luh khap a nih laia Lunglei DC-in frozen vawksa a fakmawi leh frozen vawksa lak luh khapna 'thliarkar rilru' tia a sawi chu pawi an tih tak zet thu an tarlang a, "Hemi chungchang hi a ṭul dan anga min en zuipui tur leh hma min laksak turin thuneitu sang zawkte kan phût a ni," an ti.

MSDMA Chairman-in May 30, 2024-ah Disaster Management Act tlawhchhanin vawk leh vawksa lam chi reng reng Mizoram pawn aṭanga lak luh khapna a tihchhuah laiin, Lunglei DC chuan June 6, 2024-a thupek a tihchhuahah, "ASF lên lohna state-a APEDA-in a pawmpui farm aṭangin vawksa aṭanga siam (frozen pork) lak luh phal a ni," a ti thung niin MIPFA chuan an tarlang bawk. Chief Secretary leh Lunglei DC thupek hi a inkalh avangin enfiah turin thuneitute an ngen a ni.