KHAWTHLIR
KKL-in puan hlan
Kuki Khanglai Lawmpi, Churachandpur, Manipur chuan Mizorama chhiatna thlengah mitthi an awma ruang khuhna turin nimin khan Central YMA-ah puan (Kuki shawl) 30 an hlan. CYMA kawl ṭhat turin puan/shawl pakhat an pe bawk. Thilpekte hi KKL aiawhin Kuki Welfare hruaitute'n CYMA general secretary Prof. Malsawmliana hnenah CYMA Office-ah an hlan a ni.
Mibo zawng
Lalhmuchhuaka (45), Republic Vengthlang chu June 16, 2024 zing dar 5 vel aṭangin a awmna chin hriat a ni lo a, khawtlangin an zawng. Central YMA ruahman angin vawiin aṭangin Aizawla YMA branch-te'n an zawng dawn a, vawiinah chuan YMA branch 12 thawk chhuak tura ruat an ni. Lalhmuchhuaka hian in aṭanga a chhuah laiin t-shirt sen leh kekawr bul dum a ha a, silipar a bun a, bag ṭial a ak a ni.
MHIP ruby jubilee
Aizawl South-II bialtu MLA Lalchhuanthanga chuan nimin khan a bial chhunga Salem Veng MHIP Branch ruby jubilee (kum 40-na) lawmna a hmanpui a, jubilee souvenir a tlangzarh. MHIP Gen.Hqrs aṭangin general secretary Lalliani leh hruaitu dang te, Salem Veng LC leh YMA hruaitute'n an hmanpui bawk.
Chhawmdawlna pe
Khawzawl DC pisa chuan nimin khan Khawzawla Chhanchhuahna Home leh Grace Camping Center hnenah ṭanpuina atan Rs 35,000 ve ve an hlan. Ṭanpuina hi Lok Sabha inthlanpui 2024 puala Inter District SVEEP Competition-a Khawzawl DEO Office-in lawmman pakhatna a dawn Rs 30,000 leh DC pisaa thawktute thawh khawm Rs 40,000 hmanga an pek a ni.
Zirlai chawimawi
Minister B Lalchhanzova leh Mamit bialtu MLA H Lalzirlianate chuan nimin khan MZP Hqrs, Mamit-in zirlai ti ṭha chawimawina Mamit Chhimveng YMA Hall-a an buatsaih an hmanpui. B Lalchhanzova chuan, zirlaite chu mahni intihphûr thiam tura chahin, "Ka thei ve a ni tih rilru kan put tlat chuan kan hlawhtling thei," a ti. MZP hian zirlai 39 hnenah chawimawina an hlan a, St. Francis of Assisi School hnenah Best School Award an hlan bawk.