LADC-a MDC pakuain ZPM an zawm : "Duh ila chuan sorkarna kan siam thei" - ZPM Vice President

Lai Autonomous Dis­trict Council-a member of district council (MDC) pakuate chu nimin khan ZPM party-ah lawm luh an ni. LADC Hall-a lawm luttu ZPM vice president W Chhuan­awma, deputy govt. chief whip chuan, an party-in duh ni se chuan LADC-ah sorkarna an siam theih thu a sawi.

ZPM Vice President chuan, state-ah ZPM-a sorkar hlim leh LADC sorkarah sorkarna siam thei an awm loh lai khan ZPM-in duh se chuan sorkarna an siam thei niin a sawi a, "Mahse, state sorkar hmasate'n an thuneihna hmang suala district council sorkar an pawngsual ṭhin tihtawp kan duh a, kan thuneihna kan hmang sual ve duh lo a ni," a ti.

LADC-a Lawngtlai Chandmary biala MDC by-election leh VC general election awm turah ZPM candidate-te vote tura mipui sáwmin W Chhuanawma chuan, "ZPM chuan ADC sorkar inrêlbâwlna hi a zahawm kan ti," a ti a; MDC by-election leh VC election-ah ZPM an tlin chuan LADC-ah sorkarna ngêlnghet an siam tur thu a sawi.

ZPM Vice President chuan, ZPM chu an sorkar hma leh sorkar hnua an thusawi a danglam ngai lo nia sawiin, "Pathianin rem a tih chuan ZPM hlang sorkarna pawh LADC-ah hian kan siam thei a ni. Kan tibeidawng lo ang che u," a ti.

Lawngtlai East bialtu MLA Dr Lorraine Lalpekliana Chinzah pawhin thu sawiin, ZPM policy a hlawhtlin theihna tura hma la tur leh mahni indah ṭha a, ram leh hnam tana ke penpui atan MDC an lawm luh tharte a sawm a; ZPM-in a ngaih pawimawh ber chu eirûkna do a nih thu a sawi.

ZPM party zawmtu LADC MDC-te chu - MNF aṭangin MDC pasarih - Mànghmûnga Chinzah, BN Thangpuia, CL Lianzuala, V Zathanga, T Lalengmuana, Tuturu Singh leh L Lalhma­chhuana te, independent MDC N Zangura leh LR Dingliana Chinzah-te an ni.