MULCO-in cheng nuai 207.09 an hlêp
Mizoram Milk Producers' Cooperative Union Ltd. (MULCO) chuan nimin khan an conference hall-ah inkhawmpui an hmang a, AH & Vety minister C Lalsawivunga'n a hmanpui. Kum 2023-24 chhungin MULCO-in cheng nuai 207.19 an hlêp thu tarlan a ni.
AH&Vety Minister chuan, bawng vulhtute'n an bawng vulhte an tiral nasa tih sawiin, "A hmun ngeia kut hnathawktute dinhmun ka zir chhianna aṭangin an harsatna ber pakhat chu ran chhaw a ni a, pawi ka ti hle. He harsatna sukiang tur hian department lam hotute nen theihtawp kan chhuah mek a ni," a ti.
C Lalsawivunga chuan, kum 1984-a MULCO din a nih aṭanga tun thlenga hma a sawn zelna tura nasa taka thawktu - MULCO Board of Directors, MULCO staff leh society member-te chungah a lawm thu sawiin, "MULCO kaltlangin mi tam takin eizawnna an neih phah," a ti a, Mizoram economy chawisanna kawngah MULCO-in an thawh hlâwk thu a sawi.
MULCO managing director Harsah Varhdhan tarlan danin, financial year 2023-24 chhunga MULCO sumdawnnaa sum che vêl chu cheng nuai 1,093.45 a ni a, chuta ṭanga an hlêp chu cheng nuai 207.19 a tling.
MULCO hian kut hnathawktute hnen aṭangin bawnghnute litre 9,00,000 chuang a lei a, bawnghnute lei nan Rs 4,28,97,656 hman a ni. Bawnghnute an lei khawmte chu sâwngbâwlin, thil chi hrang hrang an siam chhuak a, mipui hnenah an zuar chhuak ṭhin. Bawnghnute leh bawnghnute aṭanga an siam chhuahte hralhna aṭangin kum 2023-24 khan Rs 10,48,58,249 an hmu a ni.