Sports Minister-in medal late lawmpui

Sports & Youth Services minister Lalnghinglova Hmar chuan nimin khan EcoSave Conference Hall-ah National Arm Wrestling Championship 2024, Nagpur-a neih zawh tâka Mizoram tana medal late lawmpuina hun a hmanpui. Championship-ah hian Mizo bân-elh chak (arm wrestler) 24 an tel a, medal 22 an la.

Minister chuan, medal late a lawmpui thu sawiin, "Eng sport discipline pawh ni se, sportman tan chuan mahni tuina a nih chuan ngaihventu leh ngaisangtu an tam emaw, tam lo emaw, tui tlata kal zel chuan hlawhtlinnain a zui ve zel. Chutihrualin, a thei tan chuan sport pakhat aia tam khelh a rem a, hei hian eizawnna kawngah pawh kawng a tihzauh phah thei," a ti.

SYS Minister chuan, infiammite hnena incentive cash award pek ṭhin chu Mizoram Olympic Association (MOA)-a inziak lutte hnenah chauh pek theih a nih avangin Arm Wrestling Association leh association dang, MOA-a la awm lote hnenah pek theih a nih rih loh thu a sawi a; association-te'n sorkarah mamawhna an neih leh pawl hmasawnna atana ṭul ang chu inpawh taka sawiho zel turin a sáwm a ni.

National Arm Wrestling Championship 2024 hi June 7-9, 2024 chhung khan Maharashtra state-a Nagpur khawpuiah neih a ni a; Mizoram aṭangin mi 24 an tel a, gold medal 10, silver medal pasarih leh bronze medal panga an la a ni.