Chhingchhipah sapthei sâwr leh ṭan

Chhingchhipa Fruit Juice Concentrate Plant-ah sapthei sâwr ṭan leh tawh a nih thu ZPM party chuan thuchhuah siamin an tarlang.

ZPM tarlan danin, Fruit Juice Concentrate Plant hi Mizoram Food & Allied Industries Corporation Limited (MIFCO) hnuaiah January 26, 1993 khan din a ni a, thei chi hrang hrang sâwngbàwlna turin khawl leh mamawh tam tak lei ni mah se, hman loha dah ṭâwl tam tak a awm. Thei sawngbawlnaah hian thawktu mi paruk an awm mek a, MIFCO-ah thawktu mi 24 an awm bawk.

Fruit Juice Concentrate Plant hi nimin khan MIFCO chairman Lalṭhazuala Rawite-in a tlawh a; ZPM sorkar hnuah a vawi khat nan sapthei sâwr bul ṭan a nih thu sawiin, "Bul ṭan thar leh chauh kan nih avangin hmabak a tam hle. Sum chu awm se khawl zawng zawng hi ṭangkai taka hman theih tur a ni a, MIFCO ṭangkaina leh Mizoram hmasawnna tura a thawh hlâwkzia kan hmu thuai ngei ang," a ti.

MIFCO Chairman sawi danin, Fruit Juice Concentrate Plant-a sapthei tui sâwr leh turin enchhinna atan Chawngtlai aṭangin sapthei kg. khatah Rs 30-in an lei. Lakhuihthei leh thlai dangte pawh sawngbawl chhoh zel tum a ni.