Minister hnenah chawimawina hlan

Mizoram Association of Targetted Intervention NGO (MATINGO) chuan June 19, Nilaini zan khan Ritz Hotel-ah an pawl vice president leh Cod Nerc founder director B Lalchhanzova, MLA-a a tlin leh minister of state a nih lawmpuina hun an buatsaih a, chawimawina an hlân.

Inkhawm hi MATINGO vice president Dr Chawnglungmuana'n a kaihruai a; B Lalchhanzova chuan, social worker leh NGO chhûlchhuak a nih thu sawiin, MATINGO-in an hre reng chu a lawm thu a sawi a, "MATINGO hmalakna avangin HIV/AIDS dona pawhin a ṭha zawngin hma a sawn nasa a, NGO-te hmalaknate hi rawngbawlna pawimawh tak a ni," a ti.

MATINGO hi NACO-MSACS hnuaia targeted intervention (TI) project hrang hrang - inchiu ṭhin (injecting drug user), KS (female sex worker), mipa anpui kawp (man sex with man), cross border (ramri kâna che ṭhin), trucker leh link worker scheme project enkawltu tlawmngai pawl (NGO) intêlkhawmna a ni. MATINGO-ah hian NGO 36 an tel mek a, district leh khaw hrang hrangah drop-in centre an enkawl a ni.