ASF kaihhnawihah kumin 2024 chhungin vawk 8,731 a thi tawh

Nimin June 20 khan vawk pùl hri, African Swine Fever (ASF) vangin khua/veng 22-ah vawk 328 a thi a, khua/veng 17-ah vawk 306 suat a ni. Nimina vawk thi leh suat zinga 141 chu Serchhip district-a Chhuanthar Tlangnuama mi a ni. Kuminah ASF kaihhnawihah vawk 8,731 a thi tawh.

AH&Vety department tarlan danin, nimin khan ASF vangin Aizawl, Kolasib, Serchhip, Mamit leh Khawzawl district-a khua/veng 22-ah vawk 328 a thi a; kuminah January 1 aṭanga nimin thleng khan Mizoram pumah vawk 3,028 a thi tawh.

Nimina hri vanga vawk thi tamna ber Serchhip district-a Chhuanthar Tlangnuamah vawk 96 a thi a, vawk 45 suat a ni bawk.

ASF darh zel tur ven nan nimin khan Aizawl, Kolasib, Serchhip, Mamit leh Khawzawl district-ah vawk 306 suat a ni a; kuminah January 1 aṭanga nimin thleng khan Mizoram pumah vawk 5,703 suat a ni tawh. Kumina Mizoram puma vawk thi leh suat zawng zawng chu 8,731 a ni.