Ways & Means hmangin sum la pûk lo CSS hnuaiah 90:10 chiah kalpui a ni

Mizoram sorkar chuan kumin sorkar kum chhungin sorkarin sum a harsata a pûkna dan, Ways & Means hmangin Reserve Bank of India (RBI)-ah sum a la pûk lo a; central sponsored scheme (CSS)-te chu Central-in 90% leh Mizoram sorkarin 10% (90:10) sum an tumte chiah kalpui a ni.

Vanglaini palai zawhna chhangin Finance department hotute chuan, tun dinhmunah chuan CSS-te chu sharing pattern 90:10 bak kalpui a nih hrih loh thu an sawi a, "90:10 ah pawh state sorkarin sum eng emaw zat a tum tur a awm ṭhin a, hei pawh hi a harsa hle. Chuvangin, 90:10 aia sang hi chu kan kalpui ngam hrih lo," an ti.

Finance dept. hotute chuan, CSS ṭha tak 90:10 aia sang a awm a nih chuan ngaihtuah theih a ni tih sawiin, "Scheme ṭha tak a nih chuan thuneitute'n 90:10 aia sang pawh kalpui ṭul an tih chuan kalpui theih a ni," an ti a; 90:10 aia sang scheme kalpui leh kalpui loh chu sorkar thuneitute thu thu a nih thu an sawi.

Sum leh pai enkawl kawngah theihtawp an chhuah nia sawiin Finance department hotute chuan, "Kumin sorkar kum chhungin Ways and Means hmangin RBI sum pûk a la ni lo," an ti.

Finance hotute sawi danin, Planning Commission awm lai aiin tun dinhmunah sorkar laipui aṭanga sum hmuh a awlsam zawk. Tunah chuan dil buai ngai loin sorkar laipuiin ruahmanna an siam sa angin thla tin sum an rawn pe ṭhin a, Planning Commission hun lai chuan dil leh phawt a ngai ṭhin.

Sorkar laipui hian sum chu chi hnihin an pe chhuak ṭhin a; state-in sorkar laipuia chhiah tling khawm aṭanga a chan (share of central tax) leh 14th Finance Commission-in Mizoram tana sum a ruahman aṭangin a ni.

Share of central tax hi state-in a chan tur chu sorkar kum khat atan thla 14 atan sem sawm niin, kum khat atana dah zel chu thla tin an pe chhuak ṭhin. Thla 14-a an sem sawm chhan chu sorkar laipuiin ruahman lâwk anga chhiah a hmuh ṭhat loh a, sorkar laipuiin harsatna a tawh lohna atan a ni a; beisei anga chhiah an hmu a nih chuan sorkar kum tawp dawnah state-te duhsak an ni ṭhin.

14th Finance Commission aṭanga sum ruahman chu sorkar kum khat atan thla 12 tura ṭhen sawm a ni a, thla khat atana rua-hman zel chu thla tin state hnenah pek ṭhin a ni.