PRRS avangin thawktute An awmna chhuahsan lo turin ti

AH&Vety dept. chuan thuchhuah siamin, porcine reproductive and respiratory syndrome (PRRS) leng mek avangin an dept. hnuaia field officer leh staff-te chu
ṭul bik thilah lo chuan an awmna hmun chhuahsan lo tura hriattir an nih thu an tarlang.

AH&Vety dept chuan PRRS hi Mizoramah April, 2016 chawhnu lam aṭangin a leng tih sawiin, "Tun dinhmunah district pali - Champhai, Serchhip, Lunglei, leh Lawngtlaiahte PRRS hrileng hi finfiah (confirm) a ni tawh a, vawk 3000 chuang zet he hri avang hian Zoram pumah an thi tawh nia report dawn a ni a, vawk tam takin an dam loh phah mek a ni," an ti.

PRRS hrileng mek hi a darh zau zel loh nan leh ran damlote ṭha taka enkawl turin AH & Vety dept. chuan abik takin field officer leh staff zawng zawngte theih tawp chhuah a PRRS hrileng tirem tura hma nasa lehzuala lak chhunzawm zel turin an hriattir thu sawiin, "Hrileng hi ṭha taka control hma chuan field officer leh staff zawng zawngte ṭul bik thil tak takah lo chuan mahni station chhuansan loh tur," an ti a, thupek zawm lote lakah action lak zel anih tur thu an sawi.