HSLC-a mark pek dik loh hmuchhuak Maths-a mark 99 hmutu hrechhuak

Lalsanglura s/o Remvela, Saitual High School chuan HSLC Examination 2016 result chhuaka Mathematics-a a mark hmuh chu MBSE-a complaint a awm avangin ennawn a ni a; mark 99 a hmuh avangin Mathematics-ah mark a hmu sang ber tih hmuhchhuah a ni.

MSU headquarters, Saitual thuchhuah tarlan danin, Lalsanglura hian HSLC result chhuakah khan Mathematics-ah mark 89 a hmu a, zawh-nate chháng dik veka a inhriat laia mark 89 chiah a hmuh avangin Saitual H/S chuan MBSE-ah ennawn turin an ngensak a; mark 99 a hmu tih an hmuchhuak ta a ni.

Thu dawnna chuan, Lalsanglura hian chhang dik vekin a inhria a, exam-ah a chhàn zawh hma avangin zawhna chhân hun a tawp hmain a chhânnate chu a ennawn leh hman vek tih a sawi a; mark 100 hmu tur a nih laiin, mark 100 an inpe ngai lo a, eng emaw vangin mark khat paihsak a nih thu an sawi bawk.

Saitual MSU chuan, an member Lalsanglura, Mizoram puma Mathe-matics subject-a hmu sang ber a ni chu an chhuan thu an tarlang a; answer paper endik uluk loh vang leh fimkhur tâwk loh vanga tihsual awm ṭhin chu pawi an tih thu sawiin, "Tun hnuah hetiang thil hi a awm leh tawh loh nan fimkhur lehzual turin kan ngen a ni," an ti.

Saitual Welfare Commi-ttee, Aizawl pawh-in thuchhuah siamin, Lalsanglura mark ennawn a nih hnua mark 99 hmua Mizoram puma mathematics-a mark hmu sang ber a ni chu an lawmpui thu leh an chhuang thu an tarlang bawk.