M/s Mizo Carbon Product enfiah a ni Central subsidy dilpui tlâkah ngai lo

Industrial Growth Centre, Luangmuala M/s Mizo Carbon Product chu nimin khan mi thahnemngaiten PL Liandinga hoin an tlawh. Industry hi kum eng emaw zat a kal mumal tawh loa an hriat thu leh Central subsidy dilpui chi-a an ngaih loh thu Vanglaini an hrilh.

PL Liandinga'n Vanglaini a hrilh danin, industry hi a tirah chuan hna thawk tura din a ni a, mahse, hun eng emaw chen hna an thawk tawh lo tih an khawl awm dan aṭangin hriat theih.

An khawlte chu a tuiêk bakah, hnimte a ṭo tawh a; a hmunah chow-kidar pakhat a awm a, chu pawh chuan hlawh pawh hun rei tak a hmuh tawh loh thu a sawi.

A hmunhma leh an khawl dinhmunte enin Industry tlawhtute chuan, Central Capital Investment Subsidies (CCIS) leh Central Transport Subsidy (CTS) eng emaw zat pek an ni chu mak an tih thu Vanglaini an hrilh.

Central YMA pawhin M/s Mizo Carbon Product chu rin-hlelhawma an ngaih avangin August 14, 2014 khan Industries Minister, Parliamentary Secretary (Industries), Industries Secretary leh Industries Director hnenah chhui chiang tura ngenna an lo thehlut tawh a ni.

Vanglaini-in RTI Act hmanga a zawhna Industries department-in an chhan danin, Mizoram sorkar hnuaia state level committee (SLC) chuan M/s Mizo Carbon Product tan sorkar laipuiah ṭanpuina cheng vbc. 3.4 a dilsak tawh.

January 1, 2013 aṭanga Septem-ber 30, 2014 inkar chhungin M/s Mizo Carbon Product hian CCIS atan cheng nuai 93.90 leh raw material phurhna ṭanpuina CTS atan cheng vbc. 2.47 dilna District Industries Centre, Aizawlah an thehlut a; dilna hi SLC chuan ngaihtuahin, an dil zat angin sorkar laipuiah an dilpui a ni.

Tun dinhmunah M/s Mizo Carbon Product hian CTS atana cheng vbc. 10.34 dilna District Indus-tries Centre, Aizawlah an thehlut leh tawh a, chu chu Directo-rate of Industries-ah enfel mek niin, SLC-ah pharh leh tur a ni.