Mizoram Bru lâk lêt chungchangah Central YMA a dinna ngaiah a la ding

Central YMA president Lalbiakzuala chuan, Mizoram khua leh tui Bru, Tripura-a awm mekte Mizorama lâk lêt turte endik nan kum 1995-a electoral roll chiah an pawm tih a sawi. Hetih lai hian, June 6, 2016-a sorkar thuchhuah chuan, Bru lâk lêt turte enfiahna atan Electoral Roll 2014 hman tum a nih thu a tarlang.

June 6-a sorkar thuchhuah chuan, "Tripura-a Transit camp-a Reang (Bru) hruai kir turte hi 2014 Electoral Roll anga kalpui tum a ni a, hemia chuang lo Mizoram mi nia inchhalte chu, an thlahtute emaw, an awmna khaw hlui mi leh sa aṭanga endik an ni ang a. Hruai kir turte endik hna hi camp tinah neih phawt a ni ang," tiin a tarlang a ni.

Vanglaini palai zawhna chhangin Central YMA President chuan, June 6-a sorkar thuchhuah chungchang chu CYMA office bearer-te'n an sawiho tawh thu leh, YMA Mamit sub-headquarters hruaitute lo enfiah tura an tih thu a sawi.

CYMA President chuan, Bru-te lâk lêtna turah 1995 electoral roll-a chuangte leh an thlahte chiah hruai kîr tih chu an dinna ngai reng a nih thu leh, Joint NGO leh political party zawng zawngte dinna pawh a nih thu a sawi a, "Bru lak let tur hi kan thlithlai reng a, 1995 electoral roll base ni loa lâk lêt tum a nih chuan theihtawpin kan dodal ang," a ti.

Central YMA President sawi danin, sorkar thuchhuah chungchang hi YMA Mamit sub-headquarters hruaitute'n Mamit DC Lalbiaksangi an zawtfiah a; DC chuan, electoral roll chu update zel a ngai a, 2014 electoral roll chu kum 1995 electoral roll anga update niin a lo hrilh a ni.