Ideation Hackathon buatsaih

Assam Electronics Development Corporation Limited (AMTRON), Guwahati chuan nimin khan Ṭhuampuia Software Technology Parks of India (STPI) office-ah PM-DevINE project : Digital design and 3D printing chungchangah Ideation Hackathon thawh khatna an buatsaih a; Mizoram Information & Communication Technology secretary Sayed Musawwir Ali-in a telpui.

Ideation Hackathon-ah hian team 12 an tel a, he'ng team 12-ah hian mi 50 vel an awm. Team 12-te hian online leh offline-in 3D printing technology chungchanga an thiamna leh rawtna (idea)-te tarlangin an intihsiak a, team ti ṭha pathum hnenah Rs 11,000 ṭheuh hlan a ni.

Team ti ṭhate hi state hrang hranga team dangte nen hackathon thawh hnihnaa inel turin expert-te'n an kaihruai dawn a;

final-a team ti ṭha berin Rs 50,00,00 a dawn dawn bakah, 3D printing chungchanga thiamthil leh rawtna an phochhuahte chu a takin hmarchhak state-a zirna in hrang hrangah hman a ni dawn bawk.

He hunah hian ICT Secretary bakah, STPI Aizawl deputy director KV Chandra Verma, Neuro Engineering Lab (AIIMS) scientist D Dr Ramandeep Singh, Boon Capital founder Garima Seth, TiE Delhi-NCR sr. director Nitin Agarwal, TiE Delhi-NCR Logistic & Events head Niraj Pandey leh Kavya Chadha leh mi pawimawh dangte'n an tel.