Cyclone Remal vanga chhiatnate sorkar laipui aiawhte'n an endik ṭan

Cyclone Remal vanga Mizoram hmun hrang hranga chhiatna thleng endik tura sorkar laipuiin a ruat Inter-Ministerial Central Team member-te chuan nimin khan Mizoram an rawn thleng a, nimin vek khan Sairang, Sairang Dinthar leh Sihhmuia Tlawng lui lian vanga chhiatnate an endik.

Inter-Ministerial Central Team-ah hian Ministry of Road Transport and Highways-a regional officer Adelbert Susngi, Ministry of Jal Shakti-a SE Rajeev Singh, Rural Development ministry-a assistant commissioner Moti Ram te an ni a; vawiinah mi dang an rawn thlen belh leh ang.

Nimina Tlawng lui lian sûlhnu an enfiahnaah Disaster Management & Rehabi­litation joint director PC Lalchunglura, Aizawl additional DC Isaac Lalrempuia, IPRO Hmingthanzuala leh PWD leh PHE department aiawhte'n an ṭawiawm a; Sihhmui khawtlang aiawhte an tel bawk.

Sorkarin a chhinchhiah dan chuan, May 28, 2024-a Tlawng lui tuilian khan Sairangah chenna in 28 a chîm pil a, in ding lai 10 dang a khawih chhe tel a, chu'ng zingah chuan sikul, mosque leh mandir a tel. Sairang Dintharah tuilian vangin chenna in 12 leh sikul pakhat a chhia a; Sihhmuiah tuilianin lawngléng 12 a hnâwl bo bawk.

Inter-Ministerial Central Team hi June 25, 2024 thleng Mizoramah an chám dawn a; an chàm chhungin Melthum leh Hlimena leiminna hmun te, Greater Aizawl Water Supply Scheme Phase I&II te, Kulikawn thlanmual leh ITI Veng thlanmual te, ZMC/State Referral Hospital chhehvela leimin hlauhawm lai te, Aizawl-Aibawk-Darlung inkar kawng te, Durtlang leh Kanan Veng thlanmual leh Serchhip Zawlpui zau, Serchhipte an tlawh dawn a ni.

Central Team member-te hi nimin vek khan PHE minister Prof. Lalnilawma nen a pisa­ah an inkâwm a; Cyclone Remal vanga Mizo­rama chhiatna thleng hrang hrang, a bikin PHE, Horticulture leh Rural Development de­part­­ment kaihhnawih harsatnate an sawiho.

Prof. Lalnilawma chuan, Greater Aizawl Water Supply Phase-I a chhiat vek thu leh kháwlte siam ṭhattir tura thawn chhuah a nih thu sawiin, "Tui thianghlim mamawh ang pump chhoh a theih loh avangin mipuiin harsatna an tawk nasa," a ti a; an thil hmuhte behchhana Mizoramin a mamawh sorkar laipuia an thehluhte a theih anga chaka en zuisak turin central team-te a ngen a ni.