AR an insawn chhuak ngei dawn tih Union Home Minister-in CM a hrilh
Union Home minister Amit Shah chuan, Aizawl khawpui lailia Assam Rifles battalion headquarters chu Zokhawsanga an insawnna atan thutlukna siam a nih tawh thu leh an insawn ngei dawn thu chief minister Lalduhoma a hrilh.
Home minister Amit Shah hi CM Lalduhoma chuan June 20, Ningani khan Delhi-ah a kâwm a; Amit Shah chuan, Aizawl khawpui lailia Assam Rifles battalion sawn chhuah chungchangah thutlukna siam a nih tawh thu leh an insawn ngei dawn thu a lo hrilh tih sorkar thuchhuah chuan a tarlang.
CM Lalduhoma chuan Mizorama a rawn haw hunah Union Home Minister thusawi bawhzuiin Assam Rifles, Mizoram Home department, PHE department, PWD leh Power & Electricity department hotute a ṭhutkhawmpui dawn niin sorkar thuchhuah chuan a tarlang bawk.
Chief Minister hian sorkar laipuia mi pawimawh hrang hrangte hmu tur leh All Finance Ministers' Meeting-a tel turin June 20, 2024 khan Delhi a thleng a; hemi ni vek hian Home minister Amit Shah chu a chenna inah a kâwm a ni.
Sorkar press release tarlan danin, CM Lalduhoma chuan Cyclone Remal-in Mizorama chhiatna hrang hrang a thlen chungchangah Union Home Minister hnenah memorundum a thehlut a; Home Minister chuan, a hmuna endiktu central team-te'n report an thehluh veleh chhawmdawlna an ngaihtuah tur thu a lo hrilh.
Amit Shah chuan Chief Minister hnenah hian, Mizorama ráltlânte tan sorkar laipuiin chhawmdawlna pek a tiam tih a sawi a; CM-in Mizoram sorkar hnuaia thawk tur Mizo central service officer dah tura a dilna chu Home Minister chuan tihhlawhtlinsak ngei a tum thu a sawi. Lalduhoma'n kumin August thla ral hmaa Mizoram tlawh tura a sawmna pawh tihhlawhtlin ngei a tum tur thu a sawi bawk.
Union Home Minister Amit Shah kawmnaah hian Chief Minister hi Lok Sabha MP atana thlan tlin thar Richard Vanlalhmangaiha leh sorkar official pahnihin an ṭawiawm a ni.