LMC budget cheng nuai 1,644.62 pawm

Lunglei Municipal Council (LMC) Board of Councillor (BoC) chu nimin khan a vawi rukna atan Lunglei Convention Centre-a BoC Hall-ah an ṭhu a; he LMC budget session hmasa berah hian kum 2024-25 chhunga LMC budget (estimate) atan cheng nuai 1,644.62 an pawm.

LMC BoC ṭhutkhawm hi LMC chairman Lalzuithanga'n a kaihruai a; executive councillor (budget) Zorinsanga Hmar-in financial year 2024-25 atana LMC budget ruahman cheng nuai 1644.62 a pharh. Budget ruahman hi sawiho hnuah pawm a ni.

Ṭhutkhawmah hian business (agenda) dang - property tax chungchang, urban development grant hmanga hna thawh tur ruahmanna, Urban Foresty Project hmun tur chungchang, The Lunglei Municipal Council (Registration and Control of Dogs) Regulation 2024, LMC huam chhunga khawtlang hnatlanga phatna pawisa bituk chungchanga kaihhruainate sawiho a ni bawk.

Tarlan danin, LMC hi January 13, 2023-ah sorkarin a din a, Lunglei khawpui hmasawnna hnathawhna tur sum mawmawhte chu kumin sorkar kum kal mek aṭangin sorkar budget-ah dah niin, nimin khan LMC budget session hmasa ber neih a ni.

Financial year 2024-25-a LMC-in State Tax Devolution aṭanga grant-in-aid a hmuh chu cheng nuai 602.97 a ni a, kum hmasa aia a punna chu 339.47% a ni.

LMC BoC ROREL TLANGPUI

• Approval of Property Tax Grading Submitted by Municipal Valuation Committee : Property Tax awlsam zawka khawn a nih theih nan LMC area chu grading A, B leh C-ah ṭhen a ni.

• Grade A - main road leh commercial area kawngpuia awmte (flor rate 3% aia sang lo).

• Grade B - metalled road leh a thlen theih chin hmunte (flor rate 2.5% aia sang lo).

• Grade C - internal road (kuchha road) leh motor thlen theih lohna hmunte (flor rate 2% aia sang lo).

• Selection Site of Urban Forestry Project, LMC atan a hmunhma thlan fel an rel.

• Approval of the Lunglei Municipal (Regulation and Control of Dogs) chu regulation anga kalpui ṭha an ti.

• Councillor Development Fund /Urban Local Body Grant/Propety Tax Return tangkai zawk leh kalphung fel zawka hman a nih theih nan kaihhruaina an siam.

• Lunglei Local Council Association rawtna - Revision and Fixation of Hnatlang phat/In rùn rate within LMC hnuaiah hnatlang phatna Rs 200 leh in rùnna Rs 400 an pawm.