Ruang phurh dan tur kalphung duan mek a ni
Mizoram sorkarin mitthi ruang phurh man a tumsak turah a kalphung tur duan mek a ni a, buaipui hna chu Social Welfare department mawhphurhnaah dah a ni.
Mizoram sorkar chuan kum 2024-25 budget-ah a thlawna mitthi ruang thingtlang lama phurhna atan cheng nuai 500 a dah a; mahse, a kalphung tur tihfel a la nih loh avangin a taka hman a la ni lo.
Social Welfare department chuan ruang phurhsak chin turah ruahmanna an siam mek a, engtikah nge sorkarin mitthi ruang a phurh ṭan ang tih hriat theih a la ni lo.
Sorkarin mitthi ruang phurh man a tum turah hian mi zawng zawng a huam dawn lo a, mitthi chhungte dinhmun azirin sorkarin phurh man a tum dawn. Phurh man tum tur chin felfai taka siam tum a ni.