ZPM hruaitute'n Hlimen an tlawh

ZPM president Lalliansawta leh hruaitu dangte chuan nimin khan Hlimena leimin vanga chhiatna thlenna hmunte leh leimin vanga in leh lo chánte leh chhiat tâwk chhungkuate an tlawh a; relief camp sak meka hnatlangte ei leh in senso atan Rs 10,000 an hlan.

Lalliansawta chuan, Hlimen leh a chhehvel khuate'n chhiatna nasa tak an tâwk chu ZPM party-in pawi an tih thu sawiin, "Sorkar pawhin an harsatnate sutkian a nih theih nan an theihtawp an chhuah tih kan hria a, party ang pawhin kan ngai pawimawh hle. Chhiatna a thlen veleh khan sorkar lama kan hotute an che vat a, a lawmawmin kan chhuang hle a ni," a ti.

Chhiatrupna a thlen chángin Mizote inlung­rualna leh tlawm­­ngaihna a lang chhuak ṭhin tih sawiin Lalliansawta chuan, "Hei hian thla a timuang ṭhin. Tunah harsatna a la kiam mai lo a, in leh lo chánte bakah mitthite kan awm a, a theihna kawng awm zawng zawngah chuan kan inṭanpui zel dawn a, tun hun hi inlungrual hun a ni," a ti a; chhiat tâwkte chu ṭawngṭainaah hre reng turin hmun hrang hranga Mizote a chah.

ZPM hruaitute hian Hlimen huam chhunga in leh lo chánte leh riak chhuakte tana khawtlangin relief camp tur an sak mek an tlawh nghal a, relief camp hi chhungkaw 49 vel chenna tura duan a ni. Hlimen tlawhnaah hian ZPM vice president C Lalnunnema, treasurer Lalchhuanthanga, MLA leh hruaitu dangte an tel a ni.