KHAWTHLIR

Ṭanpuina thawh

Mara Thyutlia Py (MTP) leh Mara Hlasa Py (MHP)-te chuan tun hnaia thlipui tleh leh ruahsur nasa vanga chhiat tawkte ṭanpuina atan nimin khan Central YMA hnenah Rs 2,53,260 an thawh. Ṭanpuina sum hi CYMA office-ah an hlan a ni.

Minister-in hawng

Health & Family Welfare minister Lalrinpuii chuan nimin khan Dinthar Venga Mizoram State Health Care Society (MSHCS) office thawm ṭhat chu a hawng. MSHCS office hi Mizoram Health System Strengthening Project (MHSSP) kaltlangin cheng nuai 105.2 hmangin thawh ṭhat a ni a; contractor-te chu Brilliant Consultancy leh Lalhruaitluanga te an ni.

Minister-in hmanpui

Minister Vanlalhlana chuan nimin khan Bawngkawn South YMA Hall-ah ZN Higher Secondary School-in 6th Inter School Swimming Competition-a an sikulin medal an lak lawmna hun an buatsaih a hmanpui. Minister chuan, "Khawvela infiammi hmingthang tak tak zingah zirna degree sang tak tak nei an awm a, zirna ngaihthah loin tumruh tan chuan thil pakhat chauh ni loah hlawhtlin theih a ni," a ti.

Tomato chìn inzirtir

KVK, Khawzawl chuan nimin khan Rabung khuaah tomato chìn leh thar chungchangah Farmers' Scientist Interaction an buatsaih. He hunah hian kut hnathawktu mi 53 an tel a, IIHR (NEH) hnuaiah tomato chi pek an ni. Rabung khuaah hian chhungkaw eng emaw zatin eizawnna atan tomato an chíng a, kum 2023 aṭanga nimin thleng khan tomato quintal 600-700 vel an seng tawh a ni.

'Thlantui far'

Hmangaihhlima ziah 'Thlantui far (Infiamna thu ngaihnawm)' tih lehkhabu chu nimin khan minister of state Lalnghinglova Hmar-in MZP conference hall-ah a tlangzarh. Minister chuan, "Khawvelin mi fing a tihte chu lehkhabu chhiar tam leh chhiar zau an ni. Mizote hi eizawnna, zirna leh hnathawh kawnga hmasawn tur chuan, thlan tui far khawpa thawk turin kan inbuatsaih a ngai," a ti.