Excise & Narcotics dept-in kuminah zu Lt. 32,993.8 leh ûm 12,993 an man tawh

Excise & Narcotics department (END) chuan kumin January 1 aṭanga nimin thleng khan zu litre 32,993.8 leh ûm 12,993 an man tawh. Zu ruih vang leh mi dang tana buaina siamte chu court thu angin hremna atan vantlang hna thawhtir ṭhin an ni.

END thuchhuah tarlan danin, END chuan kuminah nimin thleng khan rakzu litre 31,715 leh Myanmar zu litre 1,278.800 man tawhin, a vaiin litre 32,993.8 a ni a; sapzu - India rama siam leh ram danga siam um 12,993 an man tawh.

END chuan, zu vanga dan bawhchhetu man zingah vantlang hmuna zu rûi leh mi dang tana buaina siam, court-in thiam loh a chantir ṭhenkhat chu The Mizoram Liquor (Prohibition) Act, 2019 Section 6(2)&(3) tlawhchhanin hremna atan vantlang hna thawhtir ṭhin an ni tih an tarlang. Vantlang hna an thawk lai chu END mite'n an vil ṭhin.

June 8, 2024 aṭanga Excise & Narcotics minister Lalnghinglova Hmar hoa Vaivakawn khawtlang leh END ṭangkawpin Vaivakawn Zohnuai huam chhunga 'A Senchi Lane' an tih mai ṭhina beihpui an thlâk mek chuan rah duhawm tak a chhuah tih END chuan an tarlang a, "He lai hmun hi a reh rih hle a, zu hralh leh lei tum an awm lo. A theih angin beihpui hi chhunzawm zel tum a ni," an ti.