AMC Ward-XIX by-election-ah MNF kan chak ngei dawn - Mayor

MNF party chuan nimin khan an pisa Mizo Hnam Rûnah chhung inkhawm an hmang a; MNF adviser leh Aizawl mayor Lalrinenga Sailo-in thu sawiin, AMC Ward-XIX by-election-ah MNF an chak ngei dawn niin a sawi.

Lalrinenga Sailo chuan, AMC by-election neih tura MNF candidate Dr Lalrinzuali Hrahsel chu a campaign tawhnaah mipuiin an ngainat rawn niin a sawi a, "Kan campaign tawhnaah mipuiteah kan boruak a ṭha hle. MNF-te kan chak ngei dawna an rin avangin ZPM-in min huphurh lâwk hle a ni," a ti.

Social media a chak tawh avangin mipuiin an hman thiam a ṭul thu sawiin Lalrinenga chuan, "Thu dik leh dik lo post kawngah finfiah hmasak a ṭul. AMC hmalakna pawh ZPM-te'n nasa takin thu dik tluantling lo hmangin an thehdarh nasa," a ti a; thu dik hriat kawngah mipuiin ngaihtuahna fim hman nachang an hriat zel a pawimawh thu a sawi.

Lalrinenga Sailo chuan, MNF chu kalphung fel leh ṭha tak nei a ni a, hma lam panin an kal zel dawn tih sawiin, "Pathian leh kan ram tan tia kal zel tur kan nih angin kan kal zel dawn a, Pathian leh mipui zarah sorkarna changin kan la ding chhuak leh ngei dawn a ni," a ti.