Apex Bank Durtlang branch hawn a ni

Minister Vanlalhlana chuan nimin khan a bial chhung Durtlangah Mizoram Cooperative Apex Bank Ltd. (MCAB) branch 28-na a hawng a; sorkar nen ṭha taka thawk tlâng zel turin MCAB hotute a sáwm.

MCAB branch thar hawnna inkhawm hi M Suaka Auditorium-ah neih niin, MCAB chairman Lalnunsanga'n a kaihruai. Vanlalhlana chuan, "Mizorama bank hrang hrang zingah an pawisa hmuh aṭanga Mizoram mipui hnena luang chhuak ṭha ber chu MCAB a ni a, deposit aṭanga loan pek chhuah tehna CD ratio pawh 78% lai a ni," a ti.

MCAB hi July 31, 1982-ah din a ni a, Mizorama bank zingah Mizoram mipui leh sorkarin neitu nihna 100% a neihna awm chhun a ni. Durtlang Branch hi Apex Bank branch 28-na a ni a, ATM booth dah nghal tura ruahman a ni.

MCAB hian Aizawl khawpuiah branch 13 leh Aizawl pawnah branch 15 a nei a; ATM booth 35, mobile van ATM pahnih (Lunglei & Mamit) an nei. A ngheta thawk mi 173 leh provisional employee 30 an awm a, private security guard 90 an chhawr mek. Kumin chhungin branch thar pariat hawn an tum bawk.