Sorkar nurse-te'n inkhawmpui an hmang

Mizoram Government Nursing Service Association (MGNSA) chuan nimin khan Aizawl Civil Hospital conference hall-ah Biennial General Conference vawi 22-na an hmang a, Health & Family Welfare minister Lalrinpuii'n a hmanpui.

Health Minister chuan, Mizoram mipui vantlang hriselna atan nurse-te an pawimawh a, an mawhphurhna sàn thu sawiin, ṭawngkam khat lek pawh miin an dam phah sawng sawng theih ṭhin avangin theihtawp chhuah lehzual turin nurse-te a ngen.

Lalrinpuii chuan, Civil Hospital, Aizawlin OPD card online-a lak theiha a kalpui ta chu chhuanawm a tih thu a sawi rualin, damdawi-ina damlo enkawlna leh a kaihhnawih thil chi hrang hrangte computer hmanga tih vek theih a nghahhlelhawm thu a sawi a; damdawi-in enkawl fai leh thianghlim kawngah ṭan la zel turin a chah bawk.

MGNSA inkhawmpuiah hian an pawl president HS Lalremtluanga pawhin thu a sawi a; secretary Lalhmingmawia Thangluah-in inkhawmpui thupui 'Nurse's role in infection control and prevention' tih a sawi a ni.