ZPM-in Ward-XIX veng paliah street campaign an buatsaih

ZPM party chuan nimin khan AMC Ward-XIX huam chhunga veng/hmun pali - Kulikawn, Tlangnuam Mualveng, Tlangnuam West (Hridaikawn) leh Saikhamakawnah by-election awm tur pualin street campaign an buatsaih a; state sorkara minister ni laite leh AMC corporator ni mekte bakah an candidate-in thu an sawi.

Minister of state Prof. Lalnilawma chuan, Ward-XIX by-election-ah ZPM candidate vote turin ward chhung mipui a sáwm a, ZPM chu mipui huapzo policy neitu a nih thu a sawi. Minister of state B Lalchhanzova chuan, ZPM sorkarin rorelna ṭha an thlentir mek nia sawiin, "Tun zirtirtu lakah pawh Zoram mipui leh party hrang hrangte kan lungawi tlang a, party mipuite pawh dik tak leh fel taka hna kan thawh theih nan min ṭawiawm zel turin ka sâwm a ni," a ti.

Minister of state Lalnghingloa Hmar chuan, ZPM a sorkar hma pawhin Ward-XIX mipuite'n ZPM candidate an thlang tling tawh tih sawiin, "ZPM candidate Dr C Malsawmtluangi hi he bialah hian hmasawnna hna thawk thei tur leh MLA thurualpui theih tur a ni," tiin, ZPM candidate thlang tling ngei turin mipui a ngen.

ZPM candidate Dr C Malsawmtluangi pawhin thu sawiin, "He bialah hian hnathawh kawr ha turin ka rawn ding a, bial mipui tan hna thawk theia min siam turin in khawngaih vote ka rawn dil tak meuh a ni,'' a ti.

AMC corporator leh Mizoram Youth Commission chairman Malsawmzuala leh corporator dang R Lalawmpuii, ZPM Zonu president ten thu an sawi bawk.