Mizoram leh Taiwan thawhho dan tur sawiho

Mizoram sorkar leh Mizoram University ṭang dun chuan June 20, Ningani khan Royale Lalawi Hotel-ah I-Shuo University, Taiwan leh Taiwan Experience Education Programme kaltlangin 'Dialogue on International Collaborations' an buatsaih a; Home minister K Sapdanga leh minister of state Prof. Lalnilawma ten an hmanpui.

He hunah hian Mizoram sorkara Rural Development department, Planning & Programme Implementation department, Horticulture department leh Higher & Technical Education department hotu te, Taiwan aṭanga mithiam lo kalte leh MZU International Affairs-a thawktute'n ram pahnih inkara thawhhona ṭha zawk siam dan tur an sawiho a ni.

Khuallian K Sapdanga chuan, Taiwan leh Mizoram sorkarin inlaichinna ṭha a neih theih nan thiamna leh theihna inzir tawnna tur buatsaih a ni chu lawmawm a tih thu a sawi a, "Mizo ṭhalai thiamna leh theihna tihpunna kawngah thil ṭangkai tak a nih ka beisei. Taiwan ram chu science & technology lama thiamna sang tak nei an nih angin heng thiamnate hi Mizoram Police department enkawl cyber security lama hmasawnna thlentu a nih ngei ka beisei a ni," a ti.

Minister of state Prof. Lalnilawma pawhin thu sawiin, inkawmhona chu National Education Policy 2020-in a tum zinga pakhat tihpuitlinna kawnga sûlsutu pawimawh tak a nih thu a sawi bawk.