Mipui chhan chhuak turin huaisen taka kan pên chhuah a ngai - Dr Mala
Congress party chuan kumina National Eligibility cum Entrance Test (NEET) exam-a thil dik lo awm duh lohna lantirna hun nimin khan an hmang a; Congress Bhavan-ah political session hmang bawkin, MPCC treasurer Dr Lalmalsawma Nghaka chuan, Mizoram mipui chhan chhuak turin huaisen taka an pên chhuah a ngaih thu a sawi.
Dr Lalmalsawma Nghaka chuan, "Vawiinah hian Congress hian tih tur kan nei, rinawm takin taimakna nen thawk ila. Mizoram mipui hian chhan chhuaktu tur an duh a, keini hi huaisen taka kan pên chhuah a ngai a ni," a ti.
Mizoramah sorkar kal tawhte'n social media-ah sawiselna nasa tak an tâwk ṭhin tih sawiin Lalmalsawma chuan, "An duh chuan an khing let ve thei ang, mahse, an khing let ngai lo. Tun sorkar ZPM kaihhruaiah hi chuan insawisel hi an ngaitheilo em em a, social media-ah pawh sawiselna an ngaitheilo em em. Narendra Modi kaihhruai BJP sorkar kal dan an entawn a, anmahni sawiseltute an man a, an bàn zel mai a ni," a ti a;
PM Modi kaihhruai sorkarin anmahni sawiseltute thubuai an nêkchêp ṭhin thu a sawi.
MPCC Treasurer chuan, tun ṭuma BJP kaihhruai sorkara minister zingah Muslim an awm lo nia sawiin, "India rama a vawi khatna a ni. NDA hnuaiah hnam hnuaihnungte rahbeh leh nêkchêp an ni a, hnam hnuaihnung MP an tlem hle," a ti a; BJP sorkarna hnuaiah thil fel lo a tam hle nia sawiin, "Electoral Bonds Scheme-te kha scam lian em em a ni a, tunah NEET scam a rawn awm leh ta a, India ramin an buaipui em em a ni," a ti.
Minister Lalrinpui’in local council leh village council-te thawhpui an harsat vanga an term pawh tawi tumna awm thu a sawi chu thil pawi tak a nih thu sawiin Lalmalsawma chuan, "Hetiang hian tun hmain tu sorkar mahin an la ti ngai lo a, mipui thlan an ni a, hetianga tih tumna a awm hi a pawi hle a ni," a ti a, minister-in a sawi âwm lo tak a nih thu a sawi.
Dr Lalmalsawma chuan, Mizoram chhehvela hnamte'n BJP leh an thawhpuite an hnâwl a, Nagaland leh Manipur-ah Congress MP an thlang tling tih a sawi a, "Chuvang chuan Mizo mipuite pawh kan inngaihtuah chian a ngai a ni," a ti.