Mizoram ngaihtuah bik a ngai - CM
Chief minister Lalduhoma, Finance minister ni bawk chuan June 22, Inrinni khan New Delhi-a Pre Budget Meeting-ah, a kaihhruai sorkar chu Mizorama danglamna thlentir tum tlat a nih thu a sawi rualin, state sum mamawhte mahnia thawk chhuak turin state dangte angin industry tih tham a awm loh avangin Mizoram chu ngaihtuah bik a ngaih thu a sawi.
State leh union territory zawng zawnga finance minister-te ṭhutkhawmna, Pre Budget Meeting hi Union Finance minister Nirmala Sitharaman-i'n a kaihruai. CM Lalduhoma chuan, "Mizoramin hun rei tak ram buai kan tuar a, 5th Five Year Plan aṭang khan mumalin kan kal ve chauh. Chuvang chuan state dangte dinhmuna ding ve phâk turin sum leh pai mamawhna a sang hle a, sum mamawhte mahnia thawk chhuak turin state dangte angin industry tihtham kan nei bawk si lo a, ngaihtuah kan ngai hle a ni," a ti.
Chief Minister chuan, Mizoram chu state ralmuang tak ni tawh mah se, ṭhenawm state leh ramtea harsatna thleng vangin Mizoram bèltu an tam thu sawiin, "Kan tan phurrit a tling. Security Related Expenditure (SRE) hi central sorkarin min pek ve loh laiin, kan ṭhenawm state leh ram aṭanga hel (insurgent group) pawlte laka invenhim ve reng kan ngai bawk si," a ti a, Mizoramin peace dividend a mamawh thu a sawi.
Lalduhoma chuan, 15th Finance Commission-in Mizoram tan special grant cheng vbc. 546 a ruahman a, mahse, Mizoramin a la dawng kim lo nasa tih a sawi a, "Kum 2019-20 leh 2020-21 budget-a Share of Taxes aṭanga Mizoram dawn tur cheng vbc. 2,370.80 zet kan la dawng lo," a ti.
Chief Minister chuan, India chu ram intodelh zawk, hmasawnna inkhairual, state tin, hnam tin leh khua leh tui zawng zawng ngaihthah bik awm lohna rama siam tura sorkar laipui, state leh UT tina finance minister-te thawhhopuiah a sawm a ni.
CHIEF MINISTER THUSAWI ṬHENKHAT
▶ 15th Finance Commission-in Mizoram tan special grant cheng vbc. 546 a ruahman a, kan la dawng kim lo nasa.
▶ Kum 2019-20 leh 2020-21 budget-a Share of Taxes aṭanga Mizoram dawn tur cheng vbc 2,370.80 kan la dawng lo.
▶ Kan sum dawn lohte avanga kan leibate hi vawiin thlengin kan la chhawm a, a chinfelna min dapsak thei ula kan duh.
▶ 14th Finance Commission leh 15th Finance Commission-ten rawtna an siam anga professional tax rate ennawn thuai a ṭha.
▶ Centrally sponsor scheme sumte single nodal agency-a pek chhuahna dan hian Central Treasury Rules a mil zân lo deuh niin ka hria.
▶ Mizoram chu ram kilkhawr, ni tin mamawh man to fàl bikna a nih avangin special package pek kan mamawh.
▶ Exterally aided project atana sum hmuh theih bithliah ennawn deuh a ṭul.
▶ SASCI sum hman dan tur awlsam deuh zawk duan a ṭul.