Mizoram sorkarin OMB hmangin cheng vbc. 71 a pûk leh dawn

Mizoram sorkar chuan Open Market Borrowing (OMB) hmangin loan cheng vbc. 71 a pûk leh dawn a, sorkar kum kal mek (2024-25) chhunga OMB hmanga sum a pûk ṭum hnihna a ni ang.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in a buaipui. RBI chuan OMB hmanga Mizoram sorkarin sum pûk tur a zawn thu June 21, 2024 khan a tichhuak.

OMB hmanga sum pûk a nih theih nan RBI-in state sorkar tan sum pûktir thei tur a zawng a, financial institution-te'n an chháng ṭhin. Mizoram sorkar sum pûk tur chháng duh tan RBI chuan June 25 thleng chhànna hun a hawng.

OMB hmanga sum pûk chu kum khatah a pung vawi hnih rulh tur a ni a, kum 10-15 velah sum pûk zawng zawng rulh tlâk a ngai a, a punna 7-8% vel a ni.

Sorkar kum kal mekah OMB hmanga sum pûk tur zata ruahman chu cheng vbc. 1,170 a ni a, sorkar kum liam ta aiin cheng vbc. 30-in a tlem zawk. Kum 2023-24 khan cheng vbc. 1,200 pûk tura ruahman a ni.

Financial year 2024-25 budget a pharh zawhah chief minister Lalduhoma, Finance enkawltu chuan, kum 2024-25 ah chuan kum 2023-24 aia tlem zawk pûk tura an dah thu a sawi rualin, pûk tur zat ruahman chu pûk ngei ngei tur tihna a nih loh thu a sawi.

Mizoram sorkar chuan May 2024 tàwp lam khan kumin sorkar kum kal meka a ṭum khatna atan OMB hmangin cheng vbc. 200 a lo puk tawh a; June thlaah hian a pûk leh a nih chuan kum kal mekah thla thum chhungin cheng vbc. 271 a pûk dawn tihna a ni.