Cyclone Remal tihchhiat thawm ṭhat nan sorkarin cheng vbc. 237.6 a ruahman - DMR Minister

Disaster Management & Rehabilitation minister K Sapdanga kaihhruaiin June 22, Inrinni khan Aijal Club-ah Cyclone Remal vanga Mizorama chhiatna thleng zir chiangtu Inter-Ministerial Team leh Mizoram sorkara a kaihhnawih hotute an inkâwm. Minister chuan, Cyclone Remal-in a tihchhiat thawm ṭhat nan a tlem thei ang bera chhûtin Mizoram sorkarin ruahmanna cheng vbc. 237.6 hû a duan thu a sawi.

K Sapdanga chuan, Mizoramin Cyclone Remal a tawrhna chu rin phâk bâk a nih thu a sawi a, "Central Team-te'n a hmun ngeia in rawn endik thei hi a lawmawm hle. Chief minister Pu Lalduhoma'n Union Home minister Pu Amit Shah hnenah nimin piah khan memorandum a thehlut a ni. Cyclone Remal tihchhiat thawm ṭhatna atan hian a tlem thei ang bera chhûtin Mizoram sorkar chuan proposal cheng vbc 237.6 man a duang a ni," a ti.

Ṭhutkhawm hi chief secretary Dr Renu Sharma-i'n a kaihruai a; DMR, PWD, PHED, PE, Agriculture leh Horticulture department-te'n Mizoram hmun hrang hranga chhiatna thlen dan leh siamṭhat hna thawhna tura mamawh zatte an tarlang a; siamṭhat hna thawh dan tur sawihona a ni.

Aijal Club-a ṭhutkhawm neih zawhah Inter-Ministerial Team member-te leh Mizoram sorkara a kaihhnawih department hotute chuan Melthum, Hlimen, Kulikawn leh ITI Venga chhiatna thlenna hmunte tlawhin an endik a ni. June 21, 2024 khan Sihhmui lei dawh mek leh Sairang Dinthara Tlawng lui lianin huan thlai a tihchhiatte an endik tawh bawk.

Central Inter-Ministerial Team hi Ministry of Home Affairs joint secretary Abhijit Sinha chuan a ho a; member dangte chu - Agriculture director Jintu Das, Ministry of Finance (Department of Expenditure) deputy director Mahesh Kumar, Ministry of Jal Shakti superintending engineer Rajveer Singh, Ministry of Road Transport & Highway regional officer Adelbert Susngi leh Rural Development assistant commissioner Moti Ram te an ni.