KHAWTHLIR

MLA fund tipung

Mizoram sorkar chuan MLA Local Area Development Fund chu cheng nuai 50-in a tipung. MLA fund hi MLA pakhat tan kum khatah cheng nuai 150 a ni ṭhin a, cheng nuai 50-a tihpun niin, MLA-te'n kum khatah fund cheng nuai 200 an nei tawh dawn. Fund tihpun hi kum kal mek 2024-25 ah hman ṭan nghal tur a ni.

GST Council-ah tel

Union Finance minister Nirmala Sitharaman, GST Council chairman ni bawk kaihhruaiin June 22, Inrinni khan Delhi-ah 53rd GST Council an ṭhukhawm a, Mizoram Taxation minister Dr Vanlalthlana a tel a, state tax commissioner R Zosiamliana leh additional commissioner HK Lalhawngliana ten an ṭawiawm. GST Council hi India rama GST chungchanga thuneitu ber a ni.

Pension gratuity

Social Welfare, Tribal Affairs, Women & Child Development chuan June 21, 2024 khan hriattirna a chhuah a, anganwadi-a thawk (worker) leh a puitu (helper)-te zinga a dawng thei chinte chu lumpsum retirement gratuity Rs 10,000 leh Rs 7,500 a pe dawn tih a tarlang.

Election training

Lai Autonomous District Council hnuaia Lawngtlai Chandmary biala Member of District Council (MDC) by-election buatsaih tura presiding officer (PRO) leh polling officer (PO)-te tan June 22, Inrinni khan Lawngtlai DC conference hall-ah training buatsaih a ni. Lawngtlai Chandmary MDC bialah hian veng pali a awm a, voter mi 2,798 an awm.

Ziakmi vui liam

Vanglaini chanchinbua thuziak thawh taima tak R Lalrempuia (43) h/o Lalduhzuali, Ramhlun South chu June 22, Inrinni chhun dar 11:30 khan a thi a, nimin chhun dar 12 khan vui a ni. R Lalrempuia hi Mizo ṭawng hman dik lohte vei tak leh mipuiin ṭawng dik an hman theihna tura thu ziak taima tak a ni a, Rempuia R Lutmang tih hmingin thu a ziak ṭhin. A thuziakte Vanglaini chanchinbua chhuah turin a thawh ṭhin a, vawi eng emaw zat tihchhuah tawh a ni.