CM-in sorkar laipui hotute hnenah Mizoram mamawh hrang hrang a thlen

Chief minister Lalduhoma chuan kar kal ta khan New Delhi-ah sorkar laipuia minister ṭhenkhat a hmu a; Parliamentary Affairs and Minority Affairs minister Kiren Rijiju a kawmnaah, Mizoram Lok Sabha MP Richard Vanlalhmangaiha chu NDA leh INDIA thlâwptu a nih loh avagnin a ṭhutna tur ngaihtuahsak turin a ngen.

CM Lalduhoma hian June 21, 2024 khan Kiren Rijiju chu a pisaah kâwmin, Parliamentary Affairs Minister a nihna angin Mizoram Lok Sabha MP chu NDA leh INDIA ni lo tana ṭhutna tur lo ngaihtuahsak tur leh, Parliament House-ah thusawina hun a tam thei ang ber pe turin a ngen a ni. Kiren Rijiju chuan CM ngenna chu bawhzuisak a tiam niin sorkar thuchhuahin a tarlang.

Sorkar thuchhuah tarlan danin, Lalduhoma'n Mizoram mamawh hrang hrang a thlen zingah Minority Affairs Minister chuan PMJVK hnuaia project 65-te chu a theih anga tihhlawhtlinsak a lo tiam a; project tihkhawtlai (pending) mek leh project thar chungchangte pawh an sawi dun a ni.

June 21 vek khan Chief Minister chuan DoNER minister Jyotiraditya Scindia chu a pisaah kâwmin, Mizoram hmasawnna turte a sawipui. DoNER Minister chuan Mizoramin North Eastern Council kaltlanga sum a hmuh ṭhin chu tihpun a lo tiam a, NESIDS OTRI chu Mizoram mila inkaihhruaina (guideline) her danglam a remtih thu a lo hrilh. Externally Aided Project hnuaia Mizoramin sum a hmuh ṭhin leh hemi kawnga harsatnate bawhzui a tiam bawk.

CM Lalduhoma chuan Union Health minister JP Nadda pawh a pisaah hmuin, Zoram Medical College (ZMC) tihchangtlun zel dan tur leh hriselna lam (health sector)-a Mizoram hmasawn dan tur a sawipui. JP Nadda chuan, ZMC tana special package dilna thehluh tawh aṭangin first instalment cheng vbc. 170 pek chhuah thuai a nih tur thu a sawi.

Union Home secretary Ajay Kumar Bhalla pawh a pisaah CM-in a kâwm. Home Secretary chuan, Cyclone Remal vanga Mizoramin chhiatna a tawhte chhawmdawlna tur cheng vbc. 21.64 chu State Disaster Respond Fund-ah pek chhuah a nih tawh thu leh second instalment pawh pek chhuah thuai a nih tur thu a lo hrilh.

Ajay Kumar Bhalla chuan, Mizoramin Security Related Expenditure (SRE) hnuaia sum a dawn ve ngai loh chungchang leh râltlân enkawlna tura mamawhte leh chhawmdawlna pek chungchang CM-in a sawite pawh bawhzui a tiam a ni.

CM Lalduhoma hian National Security adviser Ajit Doval chu Indian Army hnuaia Mizo Scout Battalion din chungchang te, Myanmar ram buai chungchang leh hmalak zel dan turte a chenna inah a sawipui.

June 22, Inrinni khan sorkar laipui minister zinga Kristian awm chhun George Kurian, Fisheries, Animal Husbandry & Dairying, Minority Affairs changtu minister of statechu a chenna inah lawmpuina a hlân a; Mizoramin vawl pùl hri, African Swine Fever vanga harsatna a tawh dan te, ran vulhtute harsatna leh chhawmdawlna pek a ṭul thute a thlen.

George Kurian chuan, ASF vanga ran vulhtute harsatna sutkianpui a tum thu CM a lo hrilh a, "Rehabilitation Scheme duang u la, min lo thawn ang a, tih dan ka lo ngaihtuah ang e," a ti. Sangha thar lama Mizoram tihhmasawn dan tur an sawi dun nghal a ni.

Chief Minister hian External Affairs minister Dr S Jaishankar, External Affairs minister of state Pabitra Margherita leh MHA joint secretary Ajit Sinha te a kâwm bawk.

CM Lalduhoma hi Lok Sabha MP Richard Vanlalhmangaiha leh Mizoram sorkar hotute'n an ṭawiawm a ni.