Olympic Day Run huaihawt a ni

June 23, nimin kha International Olympic Day a ni a, he ni pual hian June 22, Inrinni zingah khan Aizawlah Olympic Day Run neih niin, Sports & Youth Services minister Lalnghinglova Hmar-in a telpui.

Olympic Day Run hi Chanmari kawn leh Sikulpuikawn aṭanga ṭan niin, infiammi 1,000 chuang an tel a, Lammual thleng an tlân. Lammualah inkhawm tawi buatsaih niin, Mizoram Olympic Association president Robert Romawia Royte-in a kaihruai a, International Olympic Committee President thuchah chhiar chhuah a ni.

Olympic Day Run-ah hian infiamna pawl (sports association) anga tel tam ber Mizoram Badminton Association hnenah lawmman Rs 10,000 hlan a ni a; pahnihna Mizoram Football Association hnenah Rs 7,000 leh pathumna Mizoram Amateur Taekwondo Association hnenah Rs 5,000 hlan a ni bawk.

Sports minister Lalnghinglova Hmar chuan, infiammite chu an kal zelna turah theihtawp chhuah turin a chah a, "Olympic Games-ah infiamna discipline a inthlak ve reng a, infiamna khawvelin a ngaihhlut leh khawvel infiammite intawhkhawmna pui berah hian Mizo ṭhalai tam zawk an la tel theih ka beisei," a ti.