AMC by-election turah campaign an khâr

June 25, naktuka Aizawl Municipal Corporation (AMC) Ward-XIX by-election neih turah nimin tlai dar 5 khan campaign theih hun a tawp a, candidate nei political party-te chuan June 22, Inrinni khan campaign khârna hun an hmang.

ZPM Party

ZPM party chuan Hlimen community hall-ah campaign khârna hun an hmang a, ZPM president Lalliansawta, vice presi-dent C Lalnunnema, corporator kal chhuak Baryl Vanneihsangi leh ZPM candidate Dr C Malsawm-tluangi ten thu an sawi.

Lalliansawta chuan, Ward-XIX inthlanah candidate mi thiam leh fel, scientist Dr C Malsawmtluangi an dah tih sawiin, "A mimal ṭhatna hmang pawhin vote tam tak a hûi theih ngei ka beisei. He ward chhungah hian tun hnai chhoah chhiatna a thleng nasa a, corporator leh MLA thawhhona a ṭhat a ngai a, party pakhat, rorel mek hi mipuite'n khawngaiha min vote turin ka sawm a che u," a ti.

Baryl Vanneihsangi chuan, Ward-XIX mipuite'n amah an duhsak hle tih sawiin, "Corporator atan min thlan bakah, MLA-ah hial min hlangkai a, he bialah hian bialtu MLA nena hmalakna a chak leh zual theih nan ZPM candidate i vote ṭheuh ang u," a ti a; Dr C Malsawmtluangi vote turin mipui a sáwm.

ZPM vice president C Lalnunnema chuan, tun hnaia zirtirtu lâk danah mipui an lawm hle nia sawiin, "Politics chhe tak kan kalsan mek a, party sawi loin, a thiam leh tling ṭhate chauh lak an ni a, kalphung thar kan entir mek zel a ni," a ti.

BJP

BJP chuan June 22, Inrinni tlai khan campaign khàrna hun an hmang a; BJP, Mizoram Pradesh president Vanlalhmuaka chuan, Aizawl khawpui inenkawlna tura sum harsatna sutkianna atan BJP candidate a pawimawh hle nia sawiin, Ward-XIX mipuiin mawhphurhna lian tak an neih thu a sawi.

Vanlalhmuaka chuan, sorkar ṭha nei tur leh hna thawk thei tur chuan sum a ngai tih sawiin, "Chutiang tur chuan BJP candidate Pi K Vanlalruati kan thlang a nih chuan sorkar ṭhain hna thawhna tura an mamawh tak sum hi central aṭangin kan hmu thei dawn a ni," a ti a; BJP candidate vote turin mipui a sáwm.

BJP candidate K Vanlalruati pawhin thu sawiin, ward hmasawnna atana hna thawk theia amah siam turin mipui a ngen a, "Candidate-te kei aia ṭha leh fel vekte an ni ang. Kei chu central tha chakna ringtu tur ka nih avangin Ward-XIX tan malsawmna nasa zawk nih ka inbeisei," a ti a; Ward-XIX chhunga veng hrang hrang leh Aizawl khawpui hmasawnna atan amah vote turin mipui a sáwm a ni.

MNF Party

MNF party chuan thuchhuah siamin, Aizawl khawpui hmasawn zel nan leh Ward-XIX hmasawn zel nan MNF candidate vote turin mipui an sawm a, "AMC-a sorkar lai MNF corporator-te nen lungrual taka hna thawk nghal thei tur MNF candidate Dr Lalrinzuali Hrahsel lo vote ṭheuh turin Ward-XIX mipui khawngaihna kan dil nawn leh a ni," an ti.

Vote thlak chu khua leh tui ṭha mawhphurhna leh an dikna chanvo a ni tih sawiin MNF chuan, vote thlak ṭheuh turin Ward-XIX mipui an sawm a; an candidate a tlin theihna tura theihtawp chhuahtu zawng zawng chungah an lawm thu an tarlang bawk.