Zemabawkah HMV tlân tlang theih loh

Traffic SP chuan Aizawl-Tuipang inkar NH-54 kawngpui zauh hna thawh mekah lirthei tlân dan tur a tichhuak a; Zemabawkah lirthei lian (HMV) tlan tlang phal a ni lo. Thupek hian kawng siam hna thawh zawh hma zawng a huam ang.

Traffic SP chuan, Aizawl-Tuipang inkar kawng zauh hna thawh mekah tun hnaia ruahsur nasa avangin Zemabawk khaw chhunga kawng zauhna atana siam retaining wall a chim tih a tarlang a, "Siamṭhat hna thawh nghal ni mah se, ruah tla reng avangin a min belh leh zel a, kawngpui hi meter 3/4 vel chauha zau a nih tawh avang leh kawngpui hnuai lei a nghet tâwk loa a lan avangin lirthei tlân nghawr avangin chhiat belh zel thei a ni," a ti.

Zemabawka leiminna hmun hi June 22, Inrinni khan Aizawl DC, AMC, Geology & Mining department, Traffic Police, NHIDCL leh Zemabawk Local Council aiawhte'n an enho a, chumi hnuah lirthei tlan dan tur ruahman a ni.

LIRTHEI TLAN DAN TUR

* June 22, 2024 aṭanga July 1, 2024 thleng kawngpuiah lirthei lian HMV tlân tlang phal a ni lo.

* Kawngpui paltlang tur bungraw phur lirthei lian (HMV)-te chuan Ch Chhunga Truck Terminal, Rangvamualah an bungraw phurhte lirthei dang (LMV/MMV)-ah hlan chhâwn tur a ni.

* Khawchhak lam aṭanga HMV bungraw phurte chuan Zemabawk Berawluia City Bus Terminal aṭangin lirthei dang (LMV/MMV)-ah bungrua hlan chhawn tur a ni.

* LMV leh MMV (bawlhlawh paih motor)-te chu a hmuna police/company aiawh duty-te ruahmanna angin a remchan dan anga tlantir a ni ang.

* City bus-te chu Zemabawka filling station bulah kual tur a ni.

* Ruahmanna hi a ṭul a nih chuan pawhsei a ni ang.