Mizorama chhiatna hrang hrang Central team-in an endik mek zel
Cyclone Remal vanga Mizorama chhiatna thlengte zir chiang tura sorkar laipuiin a rawn tirh Inter-Ministerial Central Team chuan June 23, Pathianni leh nimin khan Aizawl, Serchhip leh Saitual district-a chhiatna thlenna hmunte an endik a, Mizoram sorkar hotute'n an ṭawiawm.
Central Team-te hian Pathianni khan Aizawl châwm tura tui lakna pathum - Greater Aizawl Water Supply Scheme Phase I & II leh Setlaka 37 MLDB Pump House bakah, Aizawl-Muallungthu-Khumtung inkar kawng leh Aizawl-Darlung inkar kawnga chhiatna hrang hrang thlengte an endik.
GAWSS Phase I & II leh SIPMIU 37 MLDB pump house enkawltute chuan, tui lianin khawl leh bungrua a tihchhiat dan an lo hrilhfiah a; mipuiin tuiah harsatna lian zawk an tawh loh nan rang taka hmalak a ṭul thu tarlan a ni.
GAWSS Phase I & II an enfiahnaah PHE department hotute chuan, Phase-I chu hna thawh nan a hman theih rih loh thu leh Phase-II hmanga chàwm mek a nih thu te, ni danga MLD 40 bawr vel pek chhuah ṭhin chu khawl chhiat vang leh nasa taka tui a nut ṭhin avangin MLD 10-15 vel chauh pek chhuah theih a nih rih thu an sawi.
Central Team hian Zoram Medical College-a mipa leh hmeichhe hostel bula leimin a hmunah an endik a; leimin vanga Aibawk leh Hlimena chhiat tâwkte leh thlipui Remal vanga loneitu harsatna tâwkte an kawm bawk.
Nimin khan Inter-Ministerial Central Team hian Serchhip district-a chhiatna thlengte a hmunah an endik a; Serchhip DC David Lalthantluanga leh mi pawimawh dangte nen Serchhip DC Meeting Hall-ah ṭhukhawmin, Serchhip DC Office, District Holticulture Office, District Agriculture Office, PHE leh PWD aiawhte'n harsatna an tawhte an tarlang.
Serchhip district-ah hian thlipui Remal avang khan khaw hrang hrangah in 60 vel a chhia a, chu'ng zinga 22 chu luah zui tlak tawh loha chhia a ni a, in 38 chu chei ṭhata luah leh tlâk (partially damaged) a ni. Serchhip district chhung village council 54-in leiminna hmun 23 an hriattir tawh a ni.
Serchhipa Holticulture office-in nimin thlenga a chhinchhiah danin, horticulture thlai hmanga eizawng loneitu 152-te chu Remal-in a nghawng a, chhiatna thlenna hmun chu hectare 130 vela zau a ni a, thlai a tihchhiat hlut zawng chu cheng nuai 41.92 hû a tling. Agriculture department hotute chuan, thlipui Remal-in mi 54-te lo a tichhia a, agriculture crop chìnna hmun hectare 40 vel a nghawng thu an sawi.
Serchhip district-ah hian Remal vanga thli leh ruahpui thawk bakah, tuihâwk luang nasa avangin leilette chu leivungin a chhilh nasa a; tui lakna (irrigation pipeline), farm machinery, Mission for Integrated Development of Horticulture (MIDH) hnuaia East Lungdara siam Sihdarh Zau Green House leh Green House Cluster dang pasarih pawh a khawih chhia tih an tarlang. Central Team hian Zawlpui zau leh Chawm leilette an fang kual a ni.
Saitual district-a Ṭawizo leh Maite inkar kawng, Dilkhan-Lungpher-Buhbân inkar kawng leh, Khanpui-Tualbung inkar kawng chhiate pawh nimin khan Central Team hian an enfiah bawk.