Tuikual South nu tualthihna police-in an chhui zo tawh

March 17, 2024 chawhma dar 10 vela Aizawl New Market-a VLH Variety Store neitu V Lalhmingthangi (52) w/o Zothanmawia, Tuikual South a dawrah thia hmuh chungchang chu police-te'n an chhui zo tawh.

Police hotute hnen aṭanga Vanglaini thu dawn danin, V Lalhmingthangi tualthihna hi chhui zawh tawh a ni a, chhuina report (chargesheet) pawh court-ah ngaihtuah a ni tawh. Uluk taka an chhui hnuah V Lalhmingthangi thia hmuh a nih nía an man Irene Lallawmzuali (34) w/o Lallungmuana, Ramthar North bak rinhlelh dang an awm lo. Irene Lallawmzuali hi jail-ah a táng mek a ni.

Court chuan police report, thuhretute thusawi, tualthattua puh thu sawi leh finfiahna hrang hrang aṭangin he thubuaiah hian thutlukna a siam ang.

Tarlan tawh angin, kumin March 17 zingah Zothanmawia, Tuikual South chuan a nupui V Lalhmingthangi chu zanah a haw loh avangin Aizawl Police Station-ah FIR thehluh a tum a, chutih mek lai chuan an fapain dawr chhungah thiin a hmu a ni. Aizawl Police Station-ah tualthah thubuai ziah luh a ni.

A hmuna thil awm dan leh thil thlenga hriat nei àwm angte thu zawhfiahna aṭangin Lalhmingthangi thattu nia rinhlelh Irene Lallawmzuali, Ramthar North chu Zemabawk Dinthar Venga a ṭhiannu inah police-in March 17 tlaiah an man.

Irene Lallawmzuali hnen aṭangin tualthahna atana a hman ni ngeia lang chemte leh V Lalhmingthangi thil neih nia hriat eng emaw zat man tel a ni.