In kângah mi pahnih kâng hlum

June 23, Pathianni zan dar 9 vel khan Lawngtlai Vengpuia Thangnawna (L) in, Assam type chu bungraw chuh hman lohin a kâng a, mi pahnih an kâng hlum.

Lawngtlai aṭanga thu dawn danin, kângmei chhuah lai hian mi pathum an awm a, mipa awm chhun chu tukverh aṭanga zuang chhuakin a insaseng hman. Suangṭiali (66) w/o Thangnawna (L) leh Thangnawna (L) unaunu Darhliangi (70)-te an insaseng hman lo a, an kâng hlum. Mitthite hi nimin khan damdawi-ina endik a nih hnuah vui an ni.

In kan chhan hriat ni lo mah se, Lawngtlaiah hian June 22, Inrinni zan aṭangin kawlphetha a awm loh avangin bati an chhi a, chuta ṭanga kâng ṭan a nih an ring.

In a kâng tih hriat a nih veleh bialtu MLA Dr Lorrain Lalpekliana Chinzah, LADC chief executive member mawhphurhna la mektu Lalropuia Chinzah leh bialtu MDC VL Hmuaka ten an awm chilh a, thil ṭulte an buaipui a ni.

Dr Lorrain Lalpekliana Chinzah chuan, chhiat tâwkte chhawmdawlna sorkar aṭanga awm theite buaipui nghal a nih tur thu a sawi a, "In dang sa turin theihtawp chhuah a ni ang," a ti.