MZU-ah graduate thar mi 4,475 an awm

Mizoram University chuan nimin khan under graduate (even semester) exam result a tichhuak a, zirlai exam 14,393 zinga 9,609 an hlawhtling. Final year (6th semester bikah zirlai 6,717 zingah graduate thar mi 4,475 an awm a, Pachhunga University College (PUC) Chemistry depart­ment-a mi Lalhriat­zuala a ti ṭha ber.

MZU under graduate (UG)-ah hian second semester, fourth semes­ter leh sixth semester-ah stream pali - arts, science, commerce leh home science-ah zirlai exam 14,393 zinga 9,609 pass in, pass percentage 66.67% a ni. Regular student 10,639 zinga 7,593 (71.37%) an pass a, repeater 3,754 zinga 2,016 (53.70%) an pass.

Sixth semester (final year) bikah zirlai 6,717 zinga 4,475 hlawhtlingin, pass percentage 66.62 a ni. Arts-ah zirlai 5,535 zinga 3,586 (64.79%) hlawhtlingin, regular student 3,326 (66.48%) leh repeater 260 (48.87%) an ni.

Science-ah exam mi 738 aṭangin graduate thar mi 510 an awm a, pass percentage 69.11 a ni a; Commerce-ah exam mi 425 zinga (363 85%) an pass a; Home Science-ah zirlai 19 zinga 16 (84.21%) an pass bawk.

6th semester-ah hian a pumpuiah Lalhriatzuala, PUC-a Chemistry zirlai chuan point (CGPA) 9.69 hmuin a ti ṭha ber. MZU hnuaiah hian UG-ah subject 27 a awm a, department/subject-a ti ṭha ber (topper) ṭheuh mi 27 zinga 18 chu PUC zirlai an ni.

MZU-in UG result a tihchhuahah hian 4th semester-ah chuan stream pali-ah zirlai exam 6,159 zinga 4,345 an pass a, pass percentage 70.55 a ni.

4th semester art stream-ah zirlai 5,229 zinga 3,673 (70.24%), science-ah zirlai 579 zinga 408 (70.47%), commerce-ah zirlai 338 zinga 255 (75%) leh, home science-ah zirlai exam 13 zinga pakua (69.23%) an pass.

Second semester-ah chuan stream pali-ah zirlai exam 1,517 zinga 789 an hlawhtling a, pass percentage 52.01% a ni. 2nd semester zirlaite hi repeater vek an ni a, regular student-te result a la chhuak ve lo.

2nd semester arts-ah zirlai exam 1,357 zinga 712 (52.47) leh science-ah zirlai 126 zinga 54 (42.86%) an pass a; commerce-ah zirlai 28 zinga 19 (68%) leh home science-ah zirlai exam mi paruk zinga pali (66.67%) an pass bawk.